Արմեն Ամիրյանը հերքում է գրատպության հետ կապված բիզնես ունենալու մասին լուրերը

Երեկ Past.am-ը հրապարակեց գրող, լրագրող Արթուր Հայրապետյանի «Սարդոստայն» գրքի շնորհանդեսի մասին նյութ:

Մեր հարցին՝ ի՞նչ սպասելիքներ են առաջացնում նորանշանակ մշակույթի նախարարի հայտարարությունները, թե գրահրատարակչական ոլորտին և գրքի շուկային մեծ ուշադրություն է դարձվելու, Ա. Հայրապետյանը պատասխանեց. «Սպասելիք չունեմ այս իշխանության մեջ գտնվող եկող-գնացող նախարարներից և մյուս պաշտոնյաներից, որովհետև իրենց շահի համար է այդ բոլորը: Ես գիտեմ, որ նախարարն ունի գրատպության հետ կապված բիզնեսներ: Փակվեց Հանրապետության հրապարակի տարածքում գտնվող գրախանութը երբ նա նշանակվեց»:

Մշակույթի նախարարության ֆեյսբուքան էջում  չուշացավ Արմեն Ամիրյանի հետևյալ պատասխանը. «Ինչ վերաբերում է գրատպության հետ կապված բիզնեսի մասին «տեղեկությանը», նախարար Արմեն Ամիրյանն առաջարկում է. «Եթե պարոն Հայրապետյանը գիտի՝ որն է այդ բիզնեսը, խնդրում եմ, որ ինձ տեղյակ պահի, գնամ՝ տեր կանգնեմ այդ բիզնեսին, անտեր չմնա»:

Նախարարության էջում հրապարակվել է նաև տեղեկատվություն առ այն, որ «Նոյյան տապան» գրախանութը Հանրապետության հրապարակից տեղափոխվել է Աբովյան 8 հասցե:

Լևոն Փանոսյան