Սերժ Սարգսյանը պարգեւատրել է «Լավագույն մարզական ընտանիք»-ի հաղթողներին (լուսանկարներ)

Նախագահ Սերժ Սարգսյանն այսօր Ծաղկաձորի օլիմպիական գլխավոր մարզահամալիրի մարզադաշտում դիտել է ՀՀ նախագահի մրցանակի համար արդեն ավանդաբար՝ տասներկուերորդ տարին անընդմեջ անցկացվող «Լավագույն մարզական ընտանիք» մրցույթի 2015թ. եզրափակիչ փուլի մրցումները:

ՀՀ նախագահի 2015 թվականի հունիսի 4-ի կարգադրությամբ մրցույթը բաժանվել է երեք ուղղությունների՝ «Լավագույն մարզական ընտանիք-2015» մրցույթ, որն անցկացվում է հունիս-սեպտեմբեր ամիսներին, «Լավագույն մարզական նախադպրոցական հիմնարկ» եւ «Հաշմանդամություն ունեցող լավագույն մարզիկ» մրցույթներ, որոնք կանցկացվեն հոկտեմբեր ամսին:

«Լավագույն մարզական ընտանիք-2015» մրցույթի 1-ին փուլին Արցախից, Երեւան քաղաքից եւ Հայաստանի Հանրապետության 10 մարզերից մասնակցել է 2.065 ընտանիք կամ 6.195 մարդ, իսկ ս.թ. հոկտեմբերին ՀՀ նախագահի մրցանակի համար «Լավագույն մարզական նախադպրոցական հիմնարկ» եւ «Հաշմանդամություն ունեցող լավագույն մարզիկ» մրցույթներին, կազմակերպիչների հավաստմամբ, կմասնակցեն 6000-ից ավելի երեխաներ եւ հաշմանդամություն ունեցող մարդիկ: Ընդհանուր առմամբ, երեք մրցույթների ընթացքում ՀՀ նախագահի մրցանակի համար մասնակիցների թիվն այս տարի կգերազանցի 12.000-ը:

«Լավագույն մարզական ընտանիք-2015» մրցույթն անցկացվել է երեք փուլով, չորս տարիքային խմբերով՝ 6-7 մրցաձեւերում: Եզրափակիչ փուլ է անցել նախնական փուլերը հաջողությամբ հաղթահարած 144 ընտանիք: Մրցույթի եզրափակիչ փուլին մասնակցել է նաեւ իր կազմում հաշմանդամ անձ ունեցող 19 ընտանիք՝ ՀՀ մարզերից, Երեւան քաղաքից եւ Արցախից:

Հանրապետության նախագահը շնորհավորել է մրցույթի հաղթողներին, հանձնել վկայագրեր, դրամական պարգեւներ եւ հուշանվերներ, նաեւ գավաթներ՝ Երեւանի, ԼՂՀ եւ ՀՀ մարզերի պատվիրակություններին: Եզրափակիչ փուլ անցած 144 ընտանիքի եւ հաշմանդամություն ունեցող 19 ընտանիքի բոլոր երեխաները նախագահի կողմից ստացել են խրախուսական նվերներ:

Սերժ Սարգսյանը ողջունել է «Մարզական ընտանիք» մրցույթի բոլոր մասնակիցներին եւ հաղթողներին, մաղթել նոր հաջողություններ: «Բոլորիս համար ակնհայտ է, որ մասնակցությունն ինքնին արդեն հաջողություն է, բայց մրցույթը մնում է մրցույթ, պայքարը մնում է պայքար։ Ուստի, արժե վայելել հաղթանակի բերկրանքը։ Եվ ես մեծ սիրով եւ հաճույքով շնորհավորում եմ բոլոր հաղթողներին։

Ամեն անգամ դիմելով ձեզ՝ ես ասում եմ, որ դուք բացի ձեր ընտանեկան մթնոլորտը ավելի հետաքրքիր դարձնելուց, բացի ձեր երեխաներին հոգեպես եւ ֆիզիկապես առողջ դաստիարակելուց, նաեւ մեծ գործ եք կատարում, որովհետեւ դուք ընդօրինակման ենթակա եք ուրիշների համար: Դուք երջանիկ մարդիկ եք, քանի որ համերաշխ ընտանիքներ եք: Առանց համերաշխության, առանց փոխօգնության, առանց ջերմ մթնոլորտի անհնար է մասնակցել այս մասսայական միջոցառմանը։ Ուստի, մեկ անգամ եւս կոչ եմ անում՝ ո՛չ միայն ինքներդ զբաղվեք, այլեւ շատ-շատերին հրավիրեք զբաղվելու, որովհետեւ մասսայական սպորտը միայն առողջություն չէ՝ մասսայական սպորտն ի վիճակի է մթնոլորտ փոխել, մարդկանց տրամադրությունը փոխել։ Բոլորիս կյանքը բաղկացած է մեծ եւ փոքր հաջողություններից, մեծ եւ փոքր հաղթանակներից, անշուշտ, նաեւ մեծ ու փոքր խնդիրներից։ Չկա այս աշխարհում որեւէ մեկը, որ խնդիր չունենա։ Խնդիրները լուծվող են եւ լուծվում են, բայց կյանքը շարունակվում է։ Մաղթում եմ ձեզ եռանդ, մաղթում եմ նոր հաջողություններ։ Դուք չեմպիոններ եք։ Ես շատ ուրախ եմ եւ շնորհակալ, որ հաճույքով մասնակցում եք այս մրցույթներին»,- ողջույնի խոսքում ասել է ՀՀ նախագահ Սերժ Սարգսյանը: