Այլակարծությունն ու ՀՀԿ–ականի ոչ կոռեկտ բառապաշարը

ՀՀԿ պատգամավոր Գագիկ Մելիքյանը, անդրադառնալով հաշմանդամ ու զոհված զինծառայողների ընտանիքներին աջակցելու նպատակով յուրաքանչյուր քաղաքացուց 1000 դրամ գանձելու թեմային ու դրա վերաբերյալ սոցցանցերում քննադատական խոսքեր հնչեցնողներին, վերջիններիս անվանել էր տականքներ: Թեմայի շուրջ Past.am-ը մեկնաբանություն ստացավ ԱԺ ՀՀԿ խմբակցության պատգամավոր Կարինե Աճեմյանից: Նա ասաց. «Ես միշտ դատապարտել եմ վիրավորանքներն այլակարծության հանդեպ: Եթե մենք խոսում ենք եվրոպական արժեքներից, եթե խոսում ենք դեմոկրատիայից, ապա իրավունք չունենք հնչեցնել նման խոսքեր»:

 

«Երբ ընթերցում ենք ամբողջ փաթեթը հասկանում ենք, թե որքան բովանդակային ու հիմնարար լուծում է այն հարցերի ու խնդիրների համար, որոնք տարիներ շարունակ մենք ունենք: Կարծում եմ, որ իշխանությունները կամ ՊՆ–ն չհասցրեցին, կամ թերացան իրազեկել հասարակությանը: Այս հարցի շուրջ կա իրազեկման խնդիր: Մենք պարտավոր ենք այդ հարցերը լուծել: Իհարկե, բոլորս էլ գիտենք, որ այսօր անապահով խավը մեծ է ու շատերի համար հազար դրամը մեծ գումար է, բայց կրկնվելով կասեմ, քանի որ կար իրազեկման խնդիր նման արձագանքներ հնչեցին: Այս պարագայում որևէ արտառոց կամ վիրավորական հնչերանգներ չպետք է լինեին: Դեմ եմ նաև այն բոլոր ծայրահեղ գնահատականներին, որոնք հնչեցին սոցցանցերում: Ես սա համարում եմ համազգային համախմբման ակտ»,– ասաց պատգամավորը: