Ընդամենը 19 տարեկանում հայ երիտասարդը գիրք է գրել հայ կերպարվեստի մասին

Լույս է տեսել է 19-ամյա Վազգեն Զախարյանի «20-21-րդ դարերի հայկական կերպարվեստը» գիրքը:

«Չնայած ծնվել և մեծացել եմ Մոսկվայում, ինձ միշտ հայ եմ զգացել և ձգտել եմ հաստատվել հայրենիքում, ինչը վերջապես իրականություն դարձավ «20-21-րդ դարերի հայկական կերպարվեստը» նախագծի շնորհիվ»,- Past.am-ի հետ զրույցում նշեց Վազգեն Զախարյանը:

Հեղինակը պատմեց, որ նախագծի շուրջ աշխատանքներն սկսվել են դեռևս 2014 թվականին Մոսկվայում: Մեր զրուցակիցը կատարել է հանրագիտարանային բավականին ծավալուն աշխատանք՝ նպատակ ունենալով նպաստել հայկական կերպարվեստի հանրայնացմանն ամբողջ աշխարհում:

Վազգենն ընդգծեց՝ ազգային-ստեղծագործական ուժն իրեն շատ է ոգեշնչում, ինքը դա շատ է կարևորում: Ըստ նրա՝ նախագիծը ցույց է տալիս մեր անկախ հայրենիքի առաջին 25 տարիների ընթացքում ձեռք բերված հայկական կերպարվեստի առաջընթացը, հատկապես գեղանկարչության և գրաֆիկայի ոլորտում: «Արվեստն այն է, ինչով ես ապրում եմ դեռ մանկուց: Դրա համար ես երախտապարտ եմ ճանաչված արվեստագետ և նկարիչ Դավիթ Աբրահամյանին, որը մեծ դեր է ունեցել իմ կյանքում:

Նրա շնորհիվ ինձ հաջողվել է ապրել արվեստի աշխարհում, լինել հայ նկարիչների և քանդակագործների ստեղծագործական և գեղարվեստական կյանքի ականատեսը՝ առիթ ունենալով հյուրընկալվել նրանց արվեստանոցներում և անմիջականորեն տեսնել նրանցից շատերին ստեղծագործելիս»,- ասաց Վազգեն Զախարյանը:

Լևոն Փանոսյան