Գյումրիում կազմակերպված սեմինարին ներկայացվել է ՀՀ երիտասարդական պետական քաղաքականությունը

ՀՀ սպորտի և երիտասարդության հարցերի նախարարությունը 2016 թվականի նոյեմբերի 21-23-ը Հայաստանի Հանրապետության 2016 թվականի երիտասարդական մայրաքաղաք Գյումրիում իրականացնում է «Մեթոդական աջակցություն Լեռնային Ղարաբաղի Հանրապետության հասարակական կազմակերպություններին և երիտասարդներին» ծրագիրը: Այս մասին «Արմենպրես»-ին տեղեկացրին ՀՀ սպորտի և երիտասարդության հարցերի նախարարության աշխատակազմի տեղեկատվության և հասարակայնության հետ կապերի բաժնից:

Ծրագրի նպատակն է մեթոդական, ուսուցողական, տեղե­կատվական և խորհրդատվական աջակ­ցություն ցուցաբերել Լեռնային Ղարաբաղի Հանրապետության մշակույթի և երիտասարդության հարցերի նախարարության երիտասարդական քաղաքականության ոլորտի համապատասխան աշխատակիցներին, ԼՂՀ-ում գործող երիտասարդական հասարակական կազմակերպություններին, ուսանողական խորհուրդների անդամներին, երիտասարդներին, խթանել նրանց գործունեությունը, զարգացնել կարողություններն ու հմտությունները:

Սեմինարի ընթացքում մասնակիցներին ներկայացվել են ՀՀ երիտասարդական պետական քաղաքականությունը, ոլորտում գործող իրավական ակտերը, երիտասարդության ոլորտում միջ­պետական, միջազգային երիտասարդական համագործակցության զարգացմանն ուղղված ծրագրերը: Անդրադարձ է կատարվել ՀՀ սպորտի և երիտասարդության հարցերի նախարարության երիտասարդական պետական քաղաքականության շրջանակներում գործող առցանց դրամաշնորհային համակարգին (www.cragrer.am): Ներկայացվել են նաև ծրագիր գրելու հմտությունները, արդյունավետ և սահմանված չափանիշներին համապատասխան դրամաշնորհային ծրագրերի հայտերի մշակման և ներկայացման ձևերը:

Ծրագրի մասնակիցներն այցելել են Գյումրու երիտասարդական պալատ, «Մհեր Մկրտչյան» թանգարան, Մարիամ և Երանուհի Ասլամազյան քույրերի պատկերասրահ:

Այսօր՝ նոյեմբերի 23-ին, գործընկերային կապերի հաստատման և խթանման նպատակով կկայանա հանդիպում Գյումրիում գործող ուսանողական խորհուրդների, երիտասարդական հասարակական կազմակերպությունների ներկայացուցիչների, ակտիվ երիտասարդների հետ՝ քննարկելու հետագա համագործակցության զարգացման ուղիներն ու համատեղ իրականացվելիք ծրագրերի և միջոցառումների հնարավորությունը: