Զարուհի Փոստանջյան. Հայաստանում դեռ իրական ընտրություններ չեն անցկացվել

ՀԱՐՑԱԶՐՈՒՅՑ 24 Նոյեմբեր, 2016 0:49

Past.am-ի հյուրն է «Ժառանգության» պատգամավոր Զարուհի Փոստանջյանը.

– Տիկին Փոստանջյան, խորհրդարանական առաջիկա ընտրություններն ի՞նչ իրավիճակ են ստեղծել ներքաղաքական դաշտում:

– Սպասողական, որոշ չափով անորոշ, բայց սպասումների այն ակնկալիքով, որ ինչ–որ պայթյուն տեղի կունենա: Չի բացառվում, որ այդ պայթյունը բերի քաոսի՝ զարգացման առիթ դառնալով:

– Ինչպե՞ս եք վերաբերվում դաշինքներին:

– Դաշինքների կազմումը չպետք է լինի արհեստական, պահից ելնելով, միայն խորհրդարանում ձայներ ունենալու նպատակով: Դաշինքները պետք է կազմվեն հստակ օրակարգի շուրջ և ունենան երկարաժամկետ ուղղվածություն: Եթե դաշինքը կազմվում է մեկ օրվա համար կամ մի անձի դեմ լինելու համար, անարդյունք է:

– Ձեր կարծիքով՝ մեր քաղաքական ուժերը կկարողանա՞ն իրենց ամբիցիաները մի կողմ դնել և մի գաղափարի շուրջ համախմբվել:

– Եթե կա գաղափար, ամբիցիան չի կարող գերակայել, իսկ, եթե կա ամբիցիա և չկա գաղափար, ինչի՞ մասին է խոսքը, կարևորը գաղափարը կիսելն է: Ամբիցիա հասկացությունն արհեստականորեն է ներմուծված: Պարզապես պետք է հստակ գաղափարի և օրակարգի շուրջ համախմբվել, ոչ թե անձի կամ անձանց:

– «Ժառանգությունն» ի՞նչ սպասելիքներ ունի առաջիկա ընտրություններից:

– Մենք դա որպես ընտրություն չենք դիտարկում, որովհետև Հայաստանում դեռ իրական ընտրություններ չեն անցկացվել, դրանք եղել են բողոքի և ընդվզման միջոցառումներ: Եթե ամեն ինչ գնա այսպիսի սցենարով և տրամաբանությամբ, ապագա «ընտրությունները» ևս կդառնան բողոքի և ընդվզման միջոցառումներ: Պետք է բողոքել, ընդվզել և, ի վերջո, հասնել հաղթանակի:

– Ո՞րն է լինելու քաղաքացիական հասարակության դերն այս ընտրություններին:

– Մեր հասարակության հիմնական խնդիրն է՝ լինել ոչ միայն քաղաքացիական հասարակություն, ունենալ քաղաքացիական պատասխանատվություն, այլև կրել քաղաքական պատասխանատվություն: Մենք մեզ պետք է դիտարկենք ոչ միայն Հայաստանում բնակվող հասարակություն, այլև համահայկական հասարակություն: Սփյուռքում ապրող մեր հայրենակիցները ևս պետք է ինտեգրվեն Հայաստանի սոցիալական և քաղաքական միջավայրին: Այդ ժամանակ մենք կարող ենք ասել, որ քաղաքական պատասխանատվություն կրող քաղաքացիական հասարակություն ենք:

Լիլիթ Վահանյան