Ներմուծումն աճում է, գնանկումը՝ շարունակվում

Տարվա երկրորդ կեսից սկսած տնտեսական ակտիվության դանդաղումը շարունակվում է մեր երկրում: Նախ, հոկտեմբերին տնտեսական ակտիվությունը սեպտեմբերի համեմատ գրանցել է 18,7% անկում (ԱՎԾ): Գրեթե տնտեսության բոլոր ճյուղերում կամ զրոյական ցուցանիշ է գրանցվել լավագույն դեպքում, կամ անկում:

 

Հատկանշական է, որ սեպտեմբերի համեմատ հոկտեմբերին անկում են գրանցել նաև արդյունաբերությունը և ծառայությունների ոլորտները, ոլորտներ, որոնք ամբողջ տարվա ընթացքում հիմնականում աճ են ապահովել: Անկում էր գրանցել նաև գյուղատնտեսությունը, սակայն այստեղ տարօրինակ ոչ մի բան չկա, քանի որ գյուղատնտեսական սեզոնը ավարտվում է:

 

Միաժամանակ շինարարության ծավալները հոկտեմբերին սեպտեմբերի համեմատ մնացել են նույն մակարդակի: Միակ դրական փաստը այն էր, որ ներմուծումը հոկտեմբերին ակտիվացել է, որտեղ այն ունեցել է 4,8% աճ: Դա հավանաբար պայմանավորված է մաքսային ոլորտում ներմուծման գործընթացների վարչապետի հսկողության տակ անցնելու իրողությամբ, ինչպես նաև դա «հսկիչ գներից» աստիճանաբար ազատվելու արդյունքն է:

 

Ինչ վերաբերում է հունվար–հոկտեմբեր ամիսների կտրվածքով Հայաստանի տնտեսության վիճակագրությանը, ապա նախորդ ժամանակահատվածի համեմատ տնտեսական ակտիվության ցուցանիշը ընդամենը 0,4% աճ է գրանցել: Այս ժամանակահատվածում տնտեսական ակտիվության ցուցանիշի աճին հիմնականում նպաստել են՝ արդյունաբերությունը, որի արտադրանքի ծավալը գրանցել է 6,5% աճ և ծառայությունների ոլորտը՝ 7,7% աճով: Գյուղատնտեսությունը և շինարարությունը ցույց են տվել համապատասխանաբար 7,3% և 9,8% անկում: Առևտրի շրջանառության ծավալները նվազել են 0,1%–ով:

 

Հայաստանում մի քանի ամիս շարունակ գրանցվում է գնանկում, սպառողական գների ինդեքսը կազմել է՝ 98,5%: Գնանկումը և ցածր գնաճը ամբողջ աշխարհում ներկայումս գերիշխող միտում է, սակայն Ադրբեջանում լրիվ հակառակ պատկերն է, այնտեղ այս ժամանակահատվածում սպառողական գների ինդեքսը կազմել է 111,6%:

 

Արտահանումը հունվար–հոկտեմբեր ժամանակահատվածի ընթացքում աճել է՝ 19,8%–ով, իսկ ներմուծումը նվազել է՝ 0,3% –ով: Արտահանման բարձր ցուցանիշը պայմանավորված է նախորդ տարվա նույն ժամանակահատվածի նկատմամբ պատրաստի սննդի արտադրանքի, թանկարժեք և կիսաթանկարժեք քարերի, թանկարժեք մետաղներ և դրանցից իրերի, բուսական ծագման արտադրանքի և մանածագործական իրերի ծավալների բարձր աճով:

 

Ամփոփելով նշենք, որ դեկտեմբերը բարձր տնտեսական ակտիվություն ապահովող ամիս է, սակայն եթե նոյեմբերին էլ շարունակվեն անկումային միտումները հոկտեմբերի նման, ապա իրավիճակը տարվա կտրվածքով չի տարբերվի ներկայի գործընթացներից: