Հայաստանի ՓՄՁ ԶԱԿ-ը կհամագործակցի Ռուսաստանի և Բելառուսի ՓՄՁ աջակցության կազմակերպությունների հետ

 Հայաստանի ՓՄՁ զարգացման ազգային կենտրոնի գործադիր տնօրեն Լևոն Մնացականյանը, Բելառուսի «Ձեռներեցեության հանրապետական կոնֆեդերացիայի» բարձրագույն համակարգող խորհրդի նախագահ Վլադիմիր Կարյագինը և Ռուսաստանի նորարարական-տեխնոլոգիական կենտրոնների միության գլխավոր տնօրենի պաշտոնակատար Լյուբոմիր Տրիֆունովիչը Մինսկում ստորագրել են գործակցության համաձայնագիր: Այս մասին «Արմենպրես»-ին տեղեկացրին «Հայաստանի փոքր և միջին ձեռնարկատիրության զարգացման ազգային կենտրոն» (ՓՄՁ ԶԱԿ) հիմնադրամից: 

Կողմերի նպատակն է Հայաստանի, Ռուսաստանի և Բելառուսի միջև ստեղծել ընդհանուր տեխնոլոգիական և տեղեկատվական տիրույթ,  որը կապահովի ՓՄՁ ոլորտի աջակցության համակարգի արդյունավետ գործունեությունը: Կողմերը նաև պայմանավորվել են մշակել Եվրասիական տնտեսական միության դրույթներին   համապատասխան գործունեության կարգավորման և համակարգման միասնական դիրքորոշում:  

Հայաստանի, Բելառուսի և Դաշնության ՓՄՁ աջակցության կառույցները նաև գործակցելու են ՓՄՁ ոլորտի աջակցության մեխանիզմների կատարելագործման և զարգացման, նորարարական ձեռնարկությունների արտադրանքի  միջազգայնացման հարցում: 

Կողմերը պայմանավորվել են սկսել հաղորդակցության միասնական համակարգի ստեղծման խորհրդակցություններ:   Այդ հարթակը պետք է նման լինի ԵՄ ՓՄՁ գործակալության գործիքներին, որոնց միջոցով կհամագործակցեն ՓՄՁ աջակցություն տրամադրող կազմակերպությունները` ներառյալ բիզնեսի միջազգայնացման և տեխնոլոգիաների փոխանակման հարցում: 

Նաև ստեղծվելու է միասնական տեղեկատվական դաշտ: Այն լուսաբանելու  է ՓՄՁ աջակցության կազմակերպությունների գործունեությունը, որը կբխի նորարարական ձեռնարկությունների, ՓՄՁ աջակցող կառույցների, փոքր և միջին բիզնեսի, ինչպես նաև ՏԻՄ կարիքներից: 

Կողմերը նաև պայմանավորվել են համատեղ խորհրդատվություններ տրամադրել ՓՄՁ-ներին և ոլորտի աջակցող կազմակերպություններին, նպաստել Հայաստանի, Բելառուսի և Ռուսաստանի ձեռնարկատիրական և մասնագիտական միությունների միջև համագործակցությանը և գործողությունների համակարգմանը` նորարարական գիտատեխնիկական և հարակից ճյուղերում: 

Համաձայնագիրը ստորագրած Հայաստանի, Բելառուսի և Ռուսաստանի Դաշնության բիզնես աջակցման  կազմակերպությունները նաև համատեղ անցկացնելու են ցուցահանդեսներ, կոնֆերանսներ, մրցույթներ, քննարկումներ և նպաստելու են այդպիսի միջոցառումներին բիզնեսների մասնակցությանը, ինչը կնպաստի վերջինների ծառայությունների, արտադրության որակի բարելավմանը: 

Կողմերը նաև ակտիվորեն ներգրավված են լինելու ՓՄՁ ոլորտի զարգացմանը վերաբերող օրենսդրության, կարգավորող մեխանիզմների մշակման հարցերի քննարկումներում:  Համաձայնագրի կողմերը ՓՄՁ ոլորտին առնչվող քննարկումներ և հանդիպումներ են կազմակերպվելու պետական, տեղական ինքնակառավարման մարմինների հետ:  

Ստորագրումից հետո Հայաստանի ՓՄՁ ԶԱԿ-ի տնօրենի գլխավորած պատվիրակությունը մասնակցել է Բելառուսի` «Տարվա ձեռներեց» մրցանակաբաշխության արարողությանը, որն անցկացվել է առաջին անգամ: