«Դասարան»-ն աշխարհի հինգ լավագույն կրթական ծրագրերի շարքում է

Դասարան կրթական ծրագրի հիմնադիր Սուրեն Ալոյանը նոյեմբերի 23-ին լրագրողների հետ զրույցում ամփոփեց «Դասարան» կրթական ծրագրի հաջողություններն ու ձեռքբերումները: «Դասարան» ծրագիրը համախմբեց ուսուցիչներին, աշակերտներին և ծնողներին:  Երկու ամիս առաջ ՄԱԿ-ի կողմից կազմակերպված նորաստեղծ ծրագրերի մրցույթում «Դասարանը» ճանաչվեց հինգ լավագույններից մեկը` հնարավորություն ստանալով ժնևում ներկայացնել Հայաստանը, որպես պոտենցիալ կրթություն արտահանող երկիր»,-«Արմենպրես»-ի փոխանցմամբ`նշեց Սուրեն Ալոյանը:

Հայաստանում ԵՄ պատվիրակության ղեկավար դեսպան Պյոտր Սվիտալսկին ընդգծեց, որ սա փոքր, բայց արդյունավետ ծրագիր է: «Երկրի ապագան երիտասարդներն են: Տաղանդավոր երիտասարդներ Հայաստանում շատ կան, պարզապես անհրաժեշտ է ճիշտ օգտագործել նրանց ունակությունները, հմտությունները, թևեր տալ նրանց: ԵՄ-ն կշարունակի աջակցել կրթական ծրագրերի իրականացմանը Հայաստանում»,-ասաց դեսպանը:

Իր գործունեության յոթը տարվա ընթացքում «Դասարանը» հասել է Հայաստանի հանրակրթական դպրոցների ամբողջական ընդգրկման` մեկ միասնական էլեկտրնային հարթակին միացնելով 1347 հանրակրթական դպրոց:

ՀՀ ԿԳ նախարար Լևոն Մկրտչյանի խոսքով` ԵՄ-ի հետ ԿԳ նախարարության համագործակցությունը կրթության և գիտության բնագավառում հստակ է: «ԵՄ-ն աջակցել է միջին մասնագիտական կրթության, գիտության որակի բարձրացմանն ուղղված մի շարք ծրագրերի: Հերթական աջակցությունն  ուղղված է էլեկտրոնային դասավանդմանը, որը Հայաստանում հանրակրթական դպրոցներում զարգացնելու կարիք ունի: Ներկայումս աշխատում ենք դրա վրա և այս հարցում հատկապես մեծ է «Դասարան»-ի դերը»,-շեշտեց նախարարը:

«Դասարան» կրթական ծրագիրը ստեղծվել է Հայաստանում` Երևանում` 2009 թվականին, մի խումբ ստեղծարար և մոտիվացված երիտասարդների նախաձեռնությամբ։ Գործունեության առաջին իսկ օրվանից կրթական ծրագրի թիմը մշակել է և ներկայումս էլ մշակում է տարբեր էլեկտրոնային գործիքներ, որոնց շնորհիվ հայ աշակերտների համար կրթությունը դառնում է առավել մատչելի և հետաքրքիր։ Հավատարիմ մնալով իր որդեգրած առաքելությանը՝ կրթության ոլորտի որակական բարեփոխմանը, կրթական ծրագիրը տրամադրում է միասնական ցանցային հարթակ՝ հագեցած ինչպես առցանց խաղերով, մր ցույթներով, օլիմպիադաներով, այնպես էլ արտացանցային միջոցառումներով։ Կրթական հարթակի վերոհիշված նախաձեռնությունները, այսպիսով, ծառայում են ոչ միայն տարբեր բնակավայրերի հանրակրթական դպրոցներում սովորող աշակերտների միջև եղած հեռավորության կրճատմանը, այլև դպրոցականների փոխհաղորդակցման կայունացմանը և սերտացմանը, ծնող-աշակերտ-ուսուցիչ կապի ամրապնդմանը։ «Դասարան» կրթական ծրագիրը հաջողությամբ համագործակցում է կրթության ոլորտի պատասխանատու պետական կառույցների՝ Հայաստանի Հանրապետության կրթության և գիտության նախարարության, Երևանի քաղաքապետարանի և այլ պետական մարմինների հետ՝ վերջինների և «Դասարան»-ի միջև կնքված համաձայնագրերի հիման վրա։