Life.panorama.am-ը գրում է.
Դերասանուհի Ծովինար Մարտիրոսյանը գրեթե մեկ տարի է, ինչ չի նկարահանվում հեռուստանախագծերում, իսկ պատճառների մասին պատմել է Life.panorama.am-ին:
«Իրականում դադարս այնքան էլ երկար չէ, գրեթե մեկ տարի, քանի որ վերջին աշխատանքը «Երջանկության արցունքները» նախագիծն էր: Ինչեւէ, այս մեկ տարվա ընթացքում չեմ ստացել այնպիսի առաջարկ, որը կցանկանայի ընդունել: Չեմ ուզում հանդես գալ փոքրիկ, էպիզոդիկ դերերով, նաեւ ինչու ոչ` առաջարկները ընդունելու հարցում ֆինանսին եւս նշանակություն եմ տալիս: Միաժամանակ` անկեղծ ասեմ, չեմ էլ նեղվում, որ այս պահին առաջարկներ չունեմ, քանի որ կդժվարանամ երեխաներիս խնամքը լիարժեք կազմակերպել: Ստեղծագործելու ցանկությունս ես լիովին կարողանում եմ բավարարել թատրոնում, որտեղ մեծ զբաղվածություն ունեմ»,- նշեց Ծովինարն ու ընդգծեց` այն դերասանուհիներից չէ, ովքեր դժգոհում են նորեկներից.
«Իրականում ուրախ եմ այն գործընկերներիս համար, ովքեր այժմ նկարահանվում են նախագծերում, երբեմն հետեւում եմ սերիալներին` նրանց դիտելու համար ու միշտ հիանում եմ, անգամ զարմանում, թե ինչպես են կարողանում այդ արագության մեջ ստեղծել տարբեր դերեր: Նաեւ շատ ուրախ եմ այն երիտասարդ դերասանների համար, ովքեր բուհն ավարտելուց հետո կարողացել են ընդգրկվել տարբեր հեռուստանախագծերում ու իրենց մասնագիտությամբ են զբաղվում: Երբեք վատ չեմ նայել, երբ երիտասարդներին են տեղ տվել, իհարկե, խոսքը չդերասանների մասին չէ, քանի որ դա պրոֆեսիոնալ դերասանների համար ցավալի է»:
Ծովինար Մարտիրոսյանը չի նկարահանվում, բայց եւ պարապուրդի մատնված չէ, ավելին` նրա խոսքով գրաֆիկը շատ խիտ է.
«Ինչպես արդեն շատերը գիտեն` Երևանի Գ.Սունդուկյանի անվան ազգային ակադեմիական թատրոնում վերանորոգման աշխատանքներ էին տարվում: Սակայն մենք շարունակում էինք ինտենսիվորեն աշխատել եւ մեր սիրելի հանդիսատեսի համար պատրաստում ենք «Պեպո» ներկայացումը, որը բեմադրում է Արմեն Էլբակյանը: Այստեղ մարմնավորում եմ Նաթելլային. Շատ հետաքրքիր ու գունեղ կերպար է ստացվում: Թատրոնի արդեն իսկ վերանորոգված բեմում մինչ տարեվերջ կներկայացնենք մեր սպասված ներկայացման պրեմիերան,- նշեց դերասանուհին ու շարունակեց.
«Զբաղված եմ նաեւ ամանորյա ներկայացումներում` դեկտեմբերին ու հունվարին կներկայացնենք «Մեծ անտառի զավակները» ներկայացումը, որն ի դեպ եւ փոքրերի, եւ մեծերի համար է: Դե իսկ հաջորդ տարի կներկայացվի «Արծվաբույն» պիեսը, որտեղ գլխավոր հերոսուհուն եմ մարմնավորում: Շատ հետաքրքիր ներկայացում է ստացվում, որը բեմադրում է երիտասարդ ու բավականին խոստումնալից ռեժիսոր Դավիթ Հարությունյանը: Այս ամենից զատ Վահե Շահվերդյանը ինձ մեծ հնարավորություն տվեց վերադառնալ հին արժեքներին, որի շրջանակում հաճախ մեկնում եմ Վանաձոր, հանդես ենք գալիս «Ռուզան» ներկայացմամբ, մարմնավորում եմ հենց Ռուզանին»:
Ծովինարը արդեն երկար ժամանակ է, ինչ նաեւ դասավանդում է.
«Ինչպես արդեն շատերը գիտեն, դասավանդում եմ Վարդան Աճեմյանի անվան դերասանական ստուդիայում, նաեւ «Հայացք» հեռուստաստուդիայում: Կարելի է ասել` գերծանրաբեռնված եմ, բայց միեւնույն է, սիրում եմ իմ աշխատանքն ու հաճույքով եմ ամեն ինչ հասցնում»,- հավելեց նա:
Մեր հարցին, թե երկու արու զավակ ունեցող Ծովինարը չի՞ մտածում դուստր ունենալու մասին, ժպիտով նշեց.
«Իհարկե, լինելով մինուճար զավակ, շատ եմ ուզում երրորդ բալիկն էլ ունենալ: Աստված առաջ` մի քանի տարի անց, կարծում եմ, մեր ընտանիքում կրկին համալրում կլինի: Իհարկե, տա Աստված աղջիկ ունենամ, սակայն եթե կրկին տղա լինի, չեմ դժգոհի»:
