Պաշտոնատար անձի կողմից դատարանին կեղծ պայմանագիր ներկայացնելու հաղորդում է ստացվել. հարուցվել է քրգործ

ՀՀ հատուկ քննչական ծառայությունը տեղեկացնում է, որ ՀՀ ոստիկանության Տավուշի մարզային վարչության նախկին ծառայող Գևորգ Պ.-ն հաղորդում է տվել ՀՀ ոստիկանության հիշյալ վարչության պետական հատուկ ծառայություն իրականացնող պաշտոնատար անձանց կողմից պաշտոնեական կեղծիք կատարելու մասին:

Հաղորդման հեղինակ Գևորգ Պ.-ն, մասնավորապես, հայտնել է, որ ծառայելով ՀՀ ոստիկանության Տավուշի մարզային վարչության Տավուշի բաժնում, 2014թ. փետրվարի 12-ից մինչև նույն թվականի մարտի 11-ն ընկած ժամանակահատվածում ՀՀ ոստիկանության ակադեմիայում մասնակցել է վերապատրաստման դասընթացների, իսկ ամիսներ անց իր դիմումի համաձայն ազատվել է ոստիկանությունում ծառայությունից: Այս մասին «Արմենպրես»-ին տեղեկացրին ՀՔԾ լրատվական ծառայությունից:

2016թ. սեպտեմբերին Տավուշի մարզի ընդհանուր իրավասության դատարանից ինքը ստացել է ծանուցում այն մասին, որ ոստիկանության Տավուշի մարզային վարչությունը քաղաքացիական հայց է ներկայացրել իր դեմ՝ հիշյալ վերապատրաստման դասընթացներին մասնակցելու համար ոստիկանության կողմից կատարած շուրջ 309 հազ. ՀՀ դրամ ծախսերի փոխհատուցման նպատակով: Դատարանից ստանալով քաղաքացիական գործի նյութերի պատճենները՝ պարզել է, որ դատարան է ներկայացվել իր և ոստիկանության Տավուշի մարզային վարչության պետական հատուկ ծառայություն իրականացնող պաշտոնատար անձի միջև կնքվա ծ՝ ուսումնական հաստատություններում ուսման, վերապատրաստման, ինչպես նաև միջին և կրտսեր խմբերի պաշտոններում նշանակվելու նպատակով ուսումնական փորձաշրջան անցնելու համար պետության կողմից կատարված ծախսերի փոխհատուցման պայմանագիր, որի տակ առկա ստորագրությունը իրենը չէ, կեղծված է:

ՀՀ ոստիկանության պետական հատուկ ծառայություն իրականացնող պաշտոնատար անձանց կողմից պաշտոնեական կեղծիք կատարելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 314-րդ հոդվածի 1-ին մասի հատկանիշներով հարուցվել է քրեական գործ:

Կատարվում է նախաքննություն: 

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: