9 ուտեստներ, որոնք ավելի թանկ են, քան ձեր բնակարանը (լուսանկարներ)

Պատկերացումներն այն մասին, թե ինչ է ասել թանկարժեք սնունդ, տարբերվում են իրարից: Ոմանց համար դա կարմիր ձուկն է, ուրիշներ համար՝ հազվագյուտ սպիտակ տրյուֆելները: Իսկ ի՞նչ կասեք ելակային դեսերտի մասին, որը 4 միլիոն դոլար արժի: Դժվար է հավատալ, որ դա հնարավոր է իրական կյանքում, սակայն որոշ ռեստորանների մենյուներում իրոք առկա են աստղաբաշխական գներով ուտեստներ: Դրանք, ինչ խոսք, հազվադեպ են պատվիրում, այնուամենայնիվ, այդպիսի ռեստորանները չեն շտապում հանել դրանք իրենց մենյուի ցանկից: Ձեզ ենք ներկայացնում 9 ուտեստներ, որոնք այնքան թանկ են, որ մի ամբողջ բնակարանի գին կարող են արժենալ, իսկ որոշ դեպքերում՝ շքեղագույն առանձնատան:

9. «Bombay Brasserie» ռեստորան, Լոնդոն

Հնդկական ուտեստ՝ սամունդարի խազանա՝ 3000 դոլար

Համեմված ուտեստ է, որը պատրաստում են ամբողջական լոբստերից, սև տրյուֆելներից, խխունջներից, դեվոնշիրյան ծովախեցգետնից ու թառափի ձկնկիթից՝ Լոնդոնում գտնվող հնդկական «Bombay Brasserie» ռեստորանում: Ուտեստները, որոնք պատրաստում է շեֆ-խոհարար Պռալադ Հեջը, հանդիսանում են այս ռեստորանի մենյուի ամենաթանկ կետերը:

8. «Fleur by Hubеrt Keller» ռեստորան, Լաս Վեգաս

Ֆլերբուրգեր՝ 5000 դոլար

Ֆրանսիացի շեֆ-խոհարար Հուբերթ Կելլերի լասվեգասյան ռեստորանում կարելի է պատվիրել սև տրյուֆելներով ու ֆուագրայով համբուրգեր: Ուտեստը մատուցվում է տապակած կարտոֆիլի ու մեկ շիշ «Chateau Petrus» գինու հետ: Թանկարժեք քարերի տեսքով դեկոր ուտեստի մատուցման համար նախատեսված չէ:

7. «Renato Viola» ռեստորան, Մայամի

«Louis XIII Remy Martin» պիցցա՝ 8300 եվրո

Պիցցան ուտեստ է, որը կարելի է գտնել գրեթե ամեն քայլափոխի, բայց պարզվում է, որ այս ուտեստն էլ կարող է աստղաբաշխական գներ ունենալ: Հայտնի իտալացի շեֆ-խոհարար Ռենատո Վիոլայի պիցցան արժե 8300 եվրո: Վարպետն իր պիցցայի պատվերներն ընդունում է անձամբ՝ Մայամի Բիչում գտնվող իր էլիտար ռեստորանում: Պիցցան պատրաստում են հաճախորդի աչքերի առաջ, եթե, իհարկե, նա ցանկանում է: Պիցցայի հիմնական բաղադրամասերն են լոբստերի միսը, ծովախեցգետիններ, երեք տեսակի ձկնկիթ, լանգուստի միս, սև գոմեշների կաթից պատրաստված հատուկ պանիր՝ մոցարելլա բուֆալո, ու, ի դեպ, այս ուտեստը մատուցելիս ևս ոչ մի թանկարժեք քար չի կիրառվում:

6. «The Fortress» հյուրանոցի ռեստորան, Շրի Լանկա

Դեսերտ՝ «Ձկնորս»՝ 14,5 հազար դոլար

«The Fortress» հյուրանոցի ռեստորանն առաջարկում է ձեզ ձկնորս պատկերող այս գեղարվեստական կոմպոզիցիան որպես դեսերտ: Ուտեստը պատրաստում են պրեմիում դասի «Dom Perignon» շամպայնով, շոկոլադով ու մրգերով: Դեսերտի գլխավոր մասը խոշոր ակվամարին քարն է, և, բնականաբար, այն մնում է այս դեսերտը պատվիրած հաճախորդին:

5. «Serpendity» ռեստորան, Նյու Յորք

Շոկոլադե դեսերտ՝ «Frrozen Haute Chocolate»՝ 25 000 դոլար

Այս պաղպաղակը, որի բաղադրության մեջ մտնում է կակաոյի 25 տեսակ, որոնցից 14-ն աշխարհի ամենաթանկ տեսակներն են, մատուցում են նյույորքյան «Serpendity» ռեստորանում: Այս ուտեստը մատուցում են թափանցիկ տարայով՝ հարած սերուցքի, տրյուֆելների ու մի քանի շերտ ուտելու ոսկու հետ: Ի հավելումն, դեսերտի հետ մատուցում են ոսկե գդալ՝ պատված ադամանդներով, որը կարելի է պահել ձեզ մոտ, քանի որ դրա գինը ներառված է ուտեստի գնի մեջ: Դեսերտը կարելի է պատվիրել՝ նախօրոք պայմանավորվելով ռեստորանի հետ: 2007 թվականին «Frrozen Haute Chocolate»-ը մտավ Գինեսի գրքի մեջ՝ որպես այդ պահին աշխարհի ամենաթանկարժեք դեսերտ:

4. «Lindeth Howe Country House» հյուրանոցի ռեստորան, Մեծ Բրիտանիա

Շոկոլադե դեսերտ՝ 34,5 հազար դոլար

Այս դեսերտի հեղինակը բրիտանացի շեֆ-խոհարար Մարկ Հիբերթն է: Բելգիական շոկոլադից պատրաստվող այս քաղցր ուտեստը զարդարված է երկու ադամանդներով ու ուտելու արծաթով: Դեսերտը մատուցում են հատուկ տարայով, որի դիզայնը մշակվել է Տեո Ֆաբերժեի՝ հայտնի ոսկեգործի թոռան կողմից: 2011 թվականին Մարկ Հիբերթի շոկոլադե այս ուտեստը ճանաչվեց Միացյալ Թագավորության ամենաթանկարժեք դեսերտ:

3. Անհատ հրուշակագործ՝ Նոբու Իկարա, Ճապոնիա

Պլատինե տորթ՝ 130 հազար դոլար

Ըստ ամենայնի, չափազանց թանկ դեսերտների նկատմամբ մեծ սերը բավականին տարածված է ծագող արևի երկրում: Մի քանի տարի առաջ ճապոնացի հրուշակագործ Նոբու Իկարան ստեղծեց 130 հազար դոլար արժողությամբ տորթ, որը հարսանեկան ոճ ուներ ու տարատեսակ պլատինե զարդերով էր ծածկված: Այս տորթը դարձավ պլատինե զարդերի վաճառքով զբաղվող «Platinum Guild International» ընկերության ցուցահանդեսի գլխավոր ցուցանմուշը:

2. «Տակաշիմայա» հրուշակեղենի խանութ, Տոկիո

Ադամանդե տորթ՝  1,7 միլիոն դոլար

Իսկ այս տորթը պատրաստել են 2005 թվականի Սուրբ ծննդյան օրը՝ Տոկիոյում գտնվող հրուշակեղենի «Տակաշիմայա» խանութում: Այս բացառիկ տորթը պատրաստել է վարպետ Չժոն-Խուն Յունը: Դա նրանից ավելի քան 6 ամիս խլեց: Արդյունքում ստացվեց մի տորթ, որը զարդարված է 223 ադամանդներով, որոնցից ոմանք սրտիկի տեսք ունեն: Ի դեպ, տորթը բավականին փոքրիկ է ու ընդամենը 20 սմ բարձրություն ունի:

1. «Arnaud’s» ռեստորան, Նոր Օռլեան

Ելակային դեսերտ՝ 3,95 միլիոն դոլար

ԱՄՆ Լուիզինա նահանգում գտնվող պոպուլյար «Arnaud’s» ռեստորանում մի ուտեստ կա, որը համարվում է աշխարհի ամենաթանկ ուտեստը: Այն իրենից ներկայացնում է քաղցր խյուսով պատված ելակ՝ անանուխի տերևներով: Եվ այսպես, ինչի՞ համար է այս ռեստորանը շուրջ 4 միլիոն դոլար պահանջում: Գաղտնիքը ուտեստի դեկորի մեջ է: Բացի անանուխի տերևներից, ելակը զարդարում է վարդագույն մեծ ադամանդով ոսկե մատանի: Այս թանկարժեք աքսեսուարը մատնացույց է անում այս դեսերտի նպատակը. այն պատվիրում են, երբ ցանկանում են ամուսնության շքեղ առաջարկություն անել: Այս դեսերտը կարելի է պատվիրել՝ միայն ռեստորանի հետ վաղօրոք պայմանավորվելով: