Վարչապետն ամրացնում է դիրքերը

Երեկ ՀՀ կառավարության նիստում վարչապետ Կարեն Կարապետյանը հայտարարեց ՀՀԿ–ին անդամակցելու իր որոշման մասին` թվելով այդ քայլին դիմելու իր հիմնավորումները:

 

«Առաջինը` վարչապետի պաշտոնում ինձ հրավիրել է ՀՀ և ՀՀԿ նախագահ Սերժ Սարգսյանը: Երկրորդ` յուրաքանչյուր կառավարություն պետք է ունենա քաղաքական հենարան, և մեր կառավարությունը եղել է առաջին հերթին Հանրապետական կուսակցության կառավարությունը: Երրորդ` եթե նույնիսկ հաշվի չառնենք առաջին երկու կետերը, ոմանց մոտ կարող է լինել տեսական հարցադրում՝ ինչո՞ւ չենք ստեղծում կամ հիմնադրում մեկ այլ կուսակցություն, որը կլիներ ձեր քաղաքական հենարանը: Ուղղակի դա արդարացված չէր լինի: Ունենալով Արցախի հիմնահարցը և մեր երկրի անվտանգությանն ուղղված սպառնալիքներ` մենք պետք է խուսափենք հնարավոր բոլոր դեստաբիլիզացիոն գործընթացներից ու զարգացումներից: Չորրորդ` ո՞ր կուսակցությունը կարող է լինել փոփոխությունների իրականացման քաղաքական հենարան: Ըստ իս՝ ՀՀԿ–ն, քանի որ ինձ հոգեհարազատ է կուսակցության պահպանողական գաղափարախոսությունը և այդտեղ ինձ համար ընդունելի բազմաթիվ մարդիկ կան»,– ասաց ՀՀ վարչապետը:

 

Իշխող կուսակցության մեջ երկիրը դեպի բարելավում տանելու վերաբերյալ հույսեր ունենալը մեծ մեղք չէ, այլ հարց է, թե ինչու անկուսակցական ռեֆորմիստը, ով, ի դեպ, ըստ շրջանառվող լուրերի, իբր ընդամենը վեց ամսով պետք է պաշտոնավարեր, որոշեց անդամագրվել ՀՀԿ–ին:

 

Սա մեկ բան է նշանակում` Կարեն Կարապետյանը եկել է, որ մնա, և մնա երկար ժամանակով` որպես վարչապետ:

 

Past.am-ը այս առիթով զրուցեց ԲՀԿ խմբակցության քարտուղար Վահե Էնֆիաջյանի հետ:

«Դա վարչապետի իրավունքն է: Եթե նա ներկայացնում է քաղաքական մեծամասնությունը, ներկայացնում է տվյալ մեծամասնության ծրագրերն ու նպատակները, ապա խոշոր հաշվով Կարեն Կարապետյանի քայլը սենսացիոն մեծ բացահայտում չեմ համարի: Պարզապես գաղափարներ կրողը նաև իրավական տեսքով դառնում է տվյալ կուսակցության անդամ ու ներկայացուցիչ: Կարող եմ նշել, որ հասարակության ու ժողովրդի կողմից Կարեն Կարապետյանն ավելի շատ ընկալվում էր որպես անկուսակցական վարչապետ»,– ասաց պատգամավորը՝ հավելելով, որ բարեփոխումների շրջանակներում վարչապետը պետք է ավելի շատ որպես անկուսակցական հանդես գար. «Այս հարցի շուրջ կընդգծեմ մեկ կարևոր հանգամանք, ժողովուրդն ավելի շատ սպասում է ոչ թե կուսակցական պատկանելության փոփոխության, այլ վարչապետի կողմից իրականացվող շոշափելի բարեփոխումների՝ սոցիալական, տնտեսական ոլորտներում»,– նկատեց Վահե Էնֆիաջյանը:

 

Հարցի շուրջ ՀՀԿ խմբակցության պատգամավոր Հովհաննես Սահակյանն էլ զրույցի ժամանակ հայտնեց, որ իշխող կուսակցությունը բազմիցս է հայտարարել, որ գործող վարչապետի ՀՀԿ անդամագրվելու հարցը չպետք է բացառել. «Կարեն Կարապետյանը վաղուց է աշխատում մեր թիմի հետ: Նրա անդամակցությունը ՀՀԿ–ին ես համարում եմ բնական ու օրինաչափ: Այստեղ որևէ արտառոց բան չեմ տեսնում: Պետք չէ նրա անդամակցության հարցը կապել երկար կամ կարճ ժամանակով պաշտոնավարելու հետ: Մենք մեր պատմության մեջ տեսել ենք, որ եղել են վարչապետեր, երբ դեռ նոր պաշտոնավարման ժամանակից սկսած ասել են, թե նա կարճ ժամանակով է պաշտոնավարելու, բայց եղել է հակառակը: Ունեցել ենք նաև անակնկալ դեպքեր, երբ չէին պատկերացնում, որ կարող է փոփոխություն լինել, սակայն եղել է:

 

Վարչապետն իր դերակատարումն ունի այն ծրագրերում, որոնք առաջ է քաշել նախագահ Սարգսյանը, նա նաև դերակատարություն ունի այն փոփոխություններում, որոնց մասին խոսվել է: Կարեն Կարապետյանը կուսակցության նախագահի գաղափարները կիսելով է անդամակցում»: