«Մոխրոց հինգշաբթի» Հայֆայում. հրդե՞հ, թե ՝ ահաբեկչություն

Իսրայելն ու աշխարհը ցնցված են այդ երկրում սկիզբ առած անտառային հրդեհների ուժգնության աստիճանից: Կրակի առաջին բոցերը նոյեմբերի 24–ի առավոտյան Հայֆա քաղաքում բռնկվեցին՝ Պազ կամրջի հարևանությամբ: Արդեն 10:45–ին տեղեկատվություն տարածվեց այն մասին, որ տարհանվում է կամրջի հարևանությամբ տեղակայված՝ Ռոմեմ և Ռամոտ Սապիր թաղամասերի բնակչությունը, իսկ 12:20–ին դրանց թիվը հասավ 12–ի՝ մոտ 60000 քաղաքացիների տարհանմամբ: 

Կեսօրին խուճապի աստիճանը հասավ բարձրակետին. չնայած զոհերի մասին տեղեկատվություն չկար, բայց քաղաքին հարող անտառներից բնակելի թաղամասեր հասած հրդեհի արդյունքում ձևավորված ամպի սև սյունն ու դրան զուգահեռ՝ ահաբեկչության մասին լուրերը, սարսափեցնող էին: Հավելյալ անհանգստության առիթ էին նաև մարդկանց գտնվելու վայրի հետ կապված որոնումները: Փակ էին խանութները, օդանավակայանը, նավահանգիստը, ուսումնական հաստատությունները, քիչ թե շատ չեզոք գոտիներում հավաքված անձանց խնդրվում էր լքել իրենց գտնվելու վայրը խիստ անհրաժեշտության դեպքում...

Չնայած իշխանությունները փորձում էին հանգստացնել մարդկանց՝ հաղորդելով, թե արվում է ամեն ինչ՝ կրակը դադարեցնելու համար, խուճապը չէր դադարում. քաղաքում ուժգին քամիներ էին, ինչը նպաստում էր հրդեհների տարածմանը, շատ էին թունավորման դեպքերը: Կրքերը փոքր–ինչ հանդարտվեցին, երբ տեղ հասան համապատասխան մասնագետների գործուն օգնությամբ՝ աշխարհի տարբեր ծագերից Իսրայել ժամանած ինքնաթիռները: Տեղական վարչակազմը շատ արագ տեղեկատվական կենտրոն ձևավորեց՝ 1–06 համարով և շտաբ՝ 03–9733333 հեռախոսահամարով: Այնպես որ, եթե այստեղ էլ կան մարդիկ, ովքեր հարազատներ ունեն այնտեղ, բայց՝ ոչ մի տեղեկատվություն, կարող են հիշյալ կոնտակտային համարներով կապ հաստատել: 

Վերադառնալով հրդեհին՝ նկատենք, որ, ցավոք, ամեն բան Հայֆայով չավարտվեց. երեկոյան հայտնի դարձավ, որ հրդեհներ են բռնկվել նաև հյուսիսում տեղակայված Կարմիել քաղաքում: Դրան գումարվեցին Նախֆ քաղաքն ու Սաջուր գյուղը, Լավոն ավանը, Ար խալուց կիբուցը, Կիրյատ–Ատան, Ցիվոն ու Սասա կիբուցները, անտառային հրդեհներ բռնկվեցին Նացերետում, որ Երուսաղեմի ու Բեյթ–Շեմեշի հարևանությամբ են գտնվում: Բնականաբար, համապատասխան մարմինները, այդ թվում՝ պաղեստինյան հրշեջ ծառայությունը կաշվից դուրս էին գալիս, իսկ արդեն առավոտյան պարզվեց, որ ոստիկանությունը մոտ 14 մարդ է ձերբակալել՝ հրդեհների միջոցով ահաբեկչություն կազմակերպելու կասկածով: Ովքեր են նրանք՝ չէր մանրամասնվում, բայց Ցֆատի գլխավոր ռավին Շմուել Էլյագին հրապարակավ առաջարկեց առանց դատ ու դատաստանի գնդակահարել նրանց:

Սրան ի պատասխան՝ Կնեսետի պատգամավոր, Եշ Ատիդ խմբակցության անդամ Յաել Գերմանն առաջարկեց ռավինին քրեական պատասխանատվության ենթարկել, որովհետև հոգևոր առաջնորդը նման պահերին պիտի հանդարտեցնի մարդկանց, ոչ թե մատից ծծած տեղեկություններ հայտնի դեռ անհայտ անձանց՝ պաղեստինցի ահաբեկիչ լինելու մասին ու սպանության կոչեր ուղղի բոլորին...