Նշանադրությանս մասին տեղյակ էին եղել բոլորը, բացի ինձանից. Նարե Գրիգորյան

ՖՈՏՈ 28 Նոյեմբեր, 2016 21:38

Երգչուհի Նարե Գրիգորյանի և նրա ըտրյալի` Արամի հարաբերությունների մասին Life.panorama.am-ն արդեն պատմել է: Այս անգամ երգչուհին մեզ հետ զրույցում մանրամասներ է ներկայացրել օրեր առաջ` նոյեմբերի 24-ին, կայացած իրենց նշանադրության արարողությունից:

«Նշանադրությանս մասին տեղյակ էին եղել բոլորը, բացի ինձանից: Ես դրա մասին տեղեկացել եմ արարողությունից ընդամենը ժամեր առաջ»,- ժպիտով նշեց Նարեն:

Նրա խոսքով` փոքր-ինչ սրտնեղել է միայն այն բանի համար, որ իր նշանադրությունից տեղյակ չլինելու պատճառով չի կարողացել նախօրոք պատրաստվել.

«Այնպես պատահեց, որ ես մտա խանութ և գնեցի առաջին իսկ պատահած զգեստը, քանի որ այլ տարբերակ պարզապես չունեի: Նույնիսկ, երբ արդեն գտնվում էինք սրահում, հավատս չէր գալիս, որ այդքան հյուր կար և որ բոլորը հավաքվել էին հենց մեզ համար»,- պատմեց Նարեն:

«Արդեն ասել եմ, որ ամուսնության դեպքում ոչ ոքի չեմ ների, եթե կրկին օրը թաքցնեն ինձանից»,- կատակեց Նարեն` հավելելով. «Թե երբ կլինի ամուսնությունը դեռ չենք ցանկանում պլանավորել, ապրում ենք այսօրվա օրով, իսկ այսօր մենք երջանիկ ենք»,- նշեց Նարե Գրիգորյանը:

Վերջինս ասաց, որ իր և սիրելիի հարաբերությունները օրինականցնելուց հետո դեռ չի հասցրել որևէ փոփոխություն զգալ, քանի որ դրանից շատ ժամանակ չի անցել:

«Փոփոխություն որպես այդպիսին դեռ չկա, միայն հոգևոր առումով եմ ինչ-որ նոր բան զգում: Նման դեպքերում հստակ սկսում ես որոշել հետագա անելիքներդ, հետագա քայլերդ, աշխատանքի հետ կապված որոշումներ ես փորձում կայացնել և այլն»,- հավելեց երգչուհին:

Նարեն տեղեկացրեց նաև, որ իր նշանածը` Արամը, այսուհետ հանդես է գալու նաև որպես իր պրոդյուսեր և իր բոլոր գործերով զբաղվելու է հենց նա:

Անդրադառնալով իր և Արամի սիրո պատմությանը` երգչուհին ասաց.

«Արամն իմ ամենամտերիմ ընկերուհու` Լուսինեի զարմիկն է, մենք ծանոթացել ենք հենց նրա միջոցով: Արամն ԱՄՆ-ից է, նա ընդամենը մեկ ամսով եկել էր Հայաստան, և այդ մեկ ամսվա ընթացքում Լուսինեն ոչինչ չխնայեց, որպեսզի մեզ ավելի մտերմացնի: Երևի հենց նա առաջինը հասկացավ, թե ինչքան ընդհանուր բան ունենք ես և Արամը: Մենք ունեցել ենք նույն ճակատագիրը, մենք շատ հարցերում նման ենք միմյանց ու նույն ձև ենք մտածում: Հենց այս ամենն էլ մեզ երկուսիս մոտեցրեց: Մենք ինքներս էլ չհասկացանք, թե ինչպես մեր ընկերական հարաբերությունները վերածվեցին սիրային հարաբերությունների: Պարտական եմ Լուսինեին իմ ամբողջ կյանքում, որովհետև նրա շնորհիվ շատ իրադարձություններ տեղի ունեցան»,- մանրամասնեց Նարե Գրիգորյանը:

Որպես վերջաբան, վերջինս ասաց, որ, ի ուրախություն իրեն, իր հետ ծանոթությունից հետո Արամն այլևս չի ցանկանում մեկնել հայրենիքից և դրա ապացույցն այն է, որ արդեն 7 ամիս է, ինչ նա ապրում է Հայաստանում: