Արմեն Մարտիրոսյանը չի բացառում, որ իրենց խաբելու սցենարը կարող է կրկնվել

ՔԱՂԱՔԱԿԱՆ 29 Նոյեմբեր, 2016 21:02

«Ժառանգություն» կուսակցության փոխնախագահ Արմեն Մարտիրոսյանը թեև անուններ չի նշում, սակայն հաստատում է, որ առաջիկա ԱԺ ընտրություններին կուսակցությունների դաշինքով մասնակցելու համար նախնական քննարկումներն, այնուամենայնիվ, ընթանում են: Ու չնայած դրանք դեռևս չեն հասել բանակցությունների փուլին, սակայն ինքն այդ մասին լռում է՝ միավորման պրոցեսին չհարվածելու համար:

«Երբ որոշակիություն կլինի, այդ ժամանակ կասեմ: Ներկա փուլում որևէ անուն ոչ կհաստատեմ, ոչ էլ կժխտեմ»,– ասաց Արմեն Մարտիրոսյանը:

Կուսակցության փոխնախագահի խոսքով՝ ընտրություններին միայնակ մասնակցելու դեպքում իրենք ներկայացված կլինեն խորհրդարանում, սակայն քանի որ ավելի կարևորում են երկրի առջև ծառացած համապետական խնդիրների լուծման հարցը, որը միայնակ լուծել չեն կարողանա, ուստիև որոշել են միավորվել այլ կուսակցությունների հետ: Իսկ կուսակցության ցածր վարկանիշի մասին խոսակցությունները, Ա. Մարտիրոսյանի կարծիքով, սև PR է:

«Ամեն անգամ ընտրություններից առաջ նման խոսակցություններ են լինում, թե «Ժառանգության» ռեյտինգն իջել է, բայց ամեն ընտրության ժամանակ զարգացումները ցույց են տալիս, որ մեր կայուն ընտրազանգվածը կա: Դա ակնհայտ էր նաև նախագահական ընտրությունների ժամանակ Րաֆֆի Հովհաննիսյանի և «Բարև Երևան» խմբակցության հաղթանակներից»,– ասում է Ա. Մարտիրոսյանը:

ԱԺ–ում կուսակցությունը մեկ պատգամավորով ներկայացված լինելու հանգամանքը նույնպես նրան չի հուսահատեցնում, քանի որ, ըստ նրա, իրականում ԱԺ–ում իրենք հինգ մանդատ ունեն, սակայն իրադարձությունների բերումով է, որ արդյունքում նման պատկեր է ձևավորվել: Նա չի բացառում, որ առաջիկա ընտրություններին նույնպես կարող է նորից իրենց խաբելու սցենարը կրկնվել, բայց եթե կուսակցությունը անցյալին նայի, ապա պետք է որևէ մեկի հետ դաշինք չկազմի:

«Ամեն կուսակցություն իր հետագիծն ունի, բայց առանց միավորվելու համապետական խնդիրները հնարավոր չի լինի լուծել: Այդ է պատճառը, որ մի փոքր մեղմ ենք վերաբերում միմյանց անցյալի նկատմամբ»,– ասում է Ա. Մարտիրոսյանը:

Նա համաձայն չէ նաև այն կարծիքի հետ, որ կուսակցությունում մեկ–երկու հոգուց բացի այլ ակտիվ դեմքեր չկան և կարծում է, որ նման խոսակցությունները իշխանությունների կողմից են շրջանառության մեջ դրվում: Բայց ինչպես Ստյոպա Սաֆարյանը, այնպես էլ ինքը ժամանակին պատգամավոր են դարձել կուսակցության ճիշտ աշխատանքի և առաջնորդի հանդեպ եղած հանրային ընկալման արդյունքում: Եվ եթե օրինակ՝ Սաֆարյանը չլինի, նրա փոխարեն մեկ այլ «պայծառ» ժառանգական կլինի, քանի որ իրենց մոտ նման խնդիր չկա:

«Կուսակցության պայծառ դեմքերը կուսակցականների ակտիվ աշխատանքի շնորհիվ են առաջացել: Եթե այդպես չէ, ապա ինչո՞ւ այդ նույն դեմքերը նախկինում պայծառ չէին: Ներկայում էլ պայծառ դեմքեր, պայծառ մտածողներ և սկզբունքային անդամներ ունենք և «Ժառանգությունն» այդ առումով որևէ խնդիր չունի»,– ասաց Ա. Մարտիրոսյանը:

Նա նաև նշեց, որ իրենց հիմնական նպատակը դեմոկրատական Հայաստան կառուցելն է: Հակառակ դեպքում քաղաքականությամբ չէին զբաղվի, ու թեև ինչպես Մոսկվան միանգամից չի կառուցվել, այնպես էլ Հայաստանը միանգամից դեմոկրատական դառնալ չի կարող, բայց որ պայքարել է հարկավոր՝ միանշանակ է:

Արմինե Գրիգորյան