Գերմանիան փակել է ներդրումային ծրագրերն Ադրբեջանում, իսկ Հայաստանի հետ՝ ընդլայնել

Հայ-գերմանական բարեկամության խմբի հայաստանյանպատվիրակության ղեկավար Արտակ Դավթյանը մանրամասներ ներկայացրեց նոյեմբերի 21-24-ը պատվիրակության՝ Գերմանիա կատարած այցի և ունեցած հանդիպումների վերաբերյալ:

Արտակ Դավթյանն անդրադարձավ Գերմանիայի կողմից Հայաստանում իրականացված ծրագրերին ու ներդրումներին և ընդգծեց, որ, սկսած 1992թ., Գերմանիան Հայաստանում 825 միլիոն եվրոյի ծրագրեր է իրականացրել: «Գերմանիան Հայաստանում ներդրումների ծավալով եվրոպական երկրներից առաջինն է: Բոլոր ներդրումային ծրագրերը, որոնք գերմանական կողմից իրականացվում են Հայաստանում, համակարգում է այդ երկրի տնտեսական զարգացման  համագործակցության նախարարությունը: Մենք նախարարության պաշտոնյաների հետ հանդիպման ժամանակ հետաքրքրվեցինք՝ ի՞նչ են մեզանից ակնկալում նÕ �րդրումներն ավելացնելու առումով: Նրանք նախ ասացին, որ խորհրդարանում պետք է արագ անցնեն այն ընթացակարգերը, որոնք վերաբերում են գերմանական ներդրումային ծրագրերին, ինչպես նաև նշեցին, որ հայկական կողմը պետք է ավելի համակարգված մոտենա այդ ծրագրերի իրականացմանը»,- «Արմենպրես»-ի հաղորդմամբ՝ նշեց Դավթյանը:

Նա հավելեց, որ Գերմանիայից ավելի շատ ներդրումներ ներգրավելու համար հայկական կողմը պետք է ներկայացնի ծրագրեր, որոնք կարող են հետաքրքիր լինել գերմանական կողմի համար: «Այնտեղ նշվեց, որ իրենք փակել են իրենց ծրագրերն Ադրբեջանում, սակայն Հայաստանի հետ շարունակում են և ընդլայնել են ծրագրերը»,-ասաց Արտակ Դավթյանը:

Նոյեմբերի 21-24-ը ԳԴՀ Բունդեսթագի Գերմանիա-Հարավային Կովկաս պատգամավորական խմբի նախագահ Կարին Շթրենցի հրավերով Արտակ Դավթյանի գլխավորությամբ Գերմանիա այցելած պատվիրակությանը կազմում էին բարեկամական խմբի անդամներ, ԱԺ ՀՀԿ խմբակցությունից Կարինե Աճեմյանը, Հայկ Գրիգորյանը, Ռուզաննա Մուրադյանը և Կարինե Պողոսյանը, ՀՅԴ խմբակցությունից Միքայել Մանուկյանը և ՀԱԿ խմբակցությունից Լյուդմիլա Սարգսյանը:

Այցի շրջանակում պատվիրակությունը հանդիպումներ է ունեցել ԳԴՀ Բունդեսթագի փոխնախագահ Կլաուդիա Ռոթի («Կանաչներ»), Բունդեսթագի Գերմանիա-Հարավային Կովկաս պատգամավորական խմբի նախագահ, ՔԴՄ/ՔՍՄ խմբակցության անդամ Կարին Շթրենցի, Բունդեսթագի մշակույթի և մամուլի հարցերով մշտական հանձնաժողովի նախագահ Զիգմունդ Էրմանի և գերմանական քաղաքական հիմնադրամների ներկայացուցիչների հետ:

Պատվիրակությունը հանդիպումներ է ունեցել նաև ԳԴՀ արտաքին գործերի եւ տնտեսական զարգացման ու համագործակցության նախարարություններում:

ՀՀ ԱԺ պատվիրակությանն ընդունել է Գերմանա-հայկական ֆորումի նախագահ Ալբերտ Վայլերը:

 Մեր պատվիրակությունն այցելել է նաև Բեռլինի կենտրոնում տեղադրված Հայոց ցեղասպանության զոհերի հիշատակին նվիրված խաչքար-հուշարձան եւ Պոտսդամի Լեփսիուսի տուն-թանգարան: