«Դեմ չեմ վիրահատական միջամտություններին. արտաքին տեսքը ներքինի այցեքարտն է». ֆոտոմոդել Գոգ Մուն

Tert.am Life-ը գրում է

«Ոճն ինձ համար անհատականությունն ընդգծելու և ինքնաարտահայտվելու միջոց է». Tert.am Life-ի հետ զրույցում այս միտքն արտահայտել է ֆոտոմոդել Գոգ Մունը: Վերջինիս հետ նոր ֆոտոշարքն իրականացնելուց հետո հարցազրույց ենք արել՝ խոսելով իր ներաշխարհի և արտաքին տեսքի մասին:

 Փոփոխությունների սիրահար եմ:

 Սիրում եմ փոփոխություններ անել: Սևահերից աստիճանաբար եմ անցել շիկահերի: Սկզբում սանրվածքս էի հաճախակի փոփոխում՝ կարճ,  համարձակ սարքվածքներ էի անում, իսկ հիմա երկար են վարսերս և երանգներն եմ փոփոխում: Կանգ եմ առել շիկահեր սպիտակի, որն ինձ դուր է գալիս և կարծում եմ, որ սա իմ գույն է և երկար ժամանակ այսպես կմնա վարսերս:

 Կյանքում էլ եմ սիրում փոփոխություններ անել:

 Կյանքում նույն տեղում մնալ չեմ սիրում: Հիմնականում պահպանողական եմ մարդկանց հարցում: Ամեն մարդու չէ, որ վստահում եմ, սիրում եմ իմ կողքին թողնել այն մարդկանց, որոնց վստահում եմ: Բնավորությամբ առաջ փոփոխական էի, իսկ հիմա ավելի կայուն եմ: Բայց անկախ նրանից, որ ժամանակը մեզ փոխում է, իմ մեջ կան ամբիցիաներ, որոնք անփոփոխ են:

 

 Ներաշխարհս հարուստ է գույներով:

 Ներաշխարհիս մեջ բոլոր գույները կան: Բոլոր գույներն էլ տեսանելի են: Ինձ ճանաչող մարդիկ ավելի լավ կարող են բնութագրել ինձ, քան ես: Չեմ սիրում իմ մասին շատ խոսել: Ավելի շատ փակ եմ: Շատ դժվար եմ բացվում, շատ դժվար եմ վստահում, պատճառն այն է, որ արագ եմ սկսում ճանաչել մարդկանց և լավ գիտեմ ում վստահեմ, ում՝ ոչ:

 Արտաքին տեսքը ներքինի այցեքարտն է:

 Եթե ունես լավ ներքին, ապա այն չի կարող չանդրադառնալ արտաքինիդ վրա: Բայց դա չի նշանակում, որ կողմ եմ այն կարծրատիպի, թե շիկահերները զիջում են իրենց խելքով սևահերներին: Նման կատակներ շատ են ինձ հետ անում, սակայն ես կարևորություն չեմ տալիս, քանի որ իսկզբանե սևահեր եմ եղել: Բայց չեմ կարծում, որ մարդու մազը կարող է բնորոշել մարդու խելացիության աստիճանը:

 Նորմալ եմ վերաբերվում, որ վիրահատական միջամտությամբ շտկում են արտաքին թերությունները:

 Դա անհատական մոտեցում է, եթե մարդ ունի արտաքինի մեջ շտկելու բան, ապա ինչո՞ւ ոչ: Ես դեմ չեմ, որ մարդիկ հետևողական են իրենց արտաքնին և միշտ խնամված են, բայց պետք չէ չափն անցնել:

 Առաջին հայացքից ավելի շատ սառը մարդ եմ:

 Մինչ ինձ ճանաչելը սառն եմ երևում, բայց իրականում այդպիսին չեմ:

 Անձնական կյանքում դժվարությամբ եմ ընտրություն կայացնում:

 Ես փնտրտուքների մեջ չեմ: Կարծում եմ ամեն ինչ կլինի իր ժամանակին: Ես բարդ բնավորություն ունեմ և կողակիցս պատկերացնում եմ իդեալիստ: