Յոժը նախագահի և կուսակցականների բոլոր խոսքերի հետ համաձայն է, իսկ գործերի հետ` ոչ

Դերասան Սերգեյ Դանիելյանը` Յոժը, մեկնաբանում է ՀՀԿ 16–րդ համագումարի դրույթները.

– Պարոն Դանիելյան, օրեր առաջ տեղի ունեցավ Հայաստանի հանրապետական կուսակցության համագումարը: Այնտեղ հնչեցին լավ գաղափարներ, սկզբունքներ: Դրանք չոգևորեցի՞ն քեզ:

– Որևէ կուսակցության անուն տվեք, որ ունենա հակապետական, հակաժողովրդական և ոչ բարոյական գաղափարներ: Չկա՛ նման կուսակցություն: Անգամ նացիստների կանոնադրությունը երբ կարդում ես, մտածում ես` ազգի մասին մտածող կարգին իշխանություն է եղել, ինչու՞ այդպես ստացվեց: Ասելս այն է, որ կարևորն այն չէ, թե ինչ գաղափարներ կլինեն:

Բայց մի բան ակնհայտ է` այդ ֆորման, կուսակցական ժողովներ անցկացնելու ձևը, ծափ տալը, քծնելը, հազարներով ձեռքը բարձրացնել–իջեցնելը գալիս է Խորհրդային Միությունից: Ես չեմ էլ մեղադրում այդ մարդկանց: Իրենք այդ են տեսել: Այդ սերունդը պետք է գնա. մենք պետք է գնանք: Դրա համար, եթե տղաս մի բան է ասում, մտածում եմ` կարո՞ղ է էս էրեխեն ճիշտ է: Հետո մտածում եմ` կարող է ճիշտ էլ չէ, բայց դա քոնը չէ, թող անի, էլի՛:

Հիմա այդ մարդկանց, համագումարը նկատի ունեմ, 90%–ը ոչ զարգացած մարդիկ են: Կոմսոմոլի քարտուղարներ են եղել, կամակատարներ են եղել: Իսկ ով որ կարդացած, գիտակ մարդ է, կարիերիստական ճանապարհներով է ուզում անցնի առաջ: Եվ ինձ համար, որպես երիտասարդի նման մտածող մարդու, իրենք կամ կարիերիստ են, կամ` դեգեներատ:

– Բայց, Սերգեյ, ասում են, որ պետք է հզոր երկիր կառուցենք, բա դա վա՞տ բան է:

– Հզոր երկիր չի կարող կառուցվել կոռումպացված հասարակությամբ: Չորս տարեկան երեխային էլ է դա պարզ: Ավելին` ապրիլյան պատերազմն էլ չէր լինի, եթե մենք հզոր երկիր լինեինք: Բանն այն է, որ եթե անգամ մեկը մյուսի հանդեպ անասնական հակումներ ունի, իրեն նման բան թույլ չի տա, եթե դիմացինը ուժեղ է: Այնպես որ, մենք լավ գիտենք, թե մեր հարևանն ինչպիսին է` եթե մենք թուլանում ենք, նա կնստի կոկորդներիս:

– Իսկ դու ռեալ համարու՞մ ես` նախագահն ասաց, որ «հայկական» ու «լավագույն» բառերն այսուհետ պետք է հոմանիշ լինեն: Այսինքն` ինչը հայկական է, ուրեմն պետք է լավագույնը լինի:

– Ես նախագահի և կուսակցականների բոլոր խոսքերի հետ համաձայն եմ: Գործերի հետ` ոչ:

– Իսկ որ պետք է անբիծ ընտրություններ կազմակերպենք, դա է՞լ վատ բան է:

– Է՜, հա՛ ասա, էլի: Ես կրկնում եմ` քանի կա այս համակարգը, մենք բանի չենք հասնի: Իսկ այդ համակարգը մենք ենք ստեղծել. բժշկին կաշառք տալիս ենք, ուսուցչին կաշառք տալիս ենք, վարորդական իրավունքը կաշառքով առնում ենք, ոստիկանին կաշառում ենք: Էլ ի՞նչ ենք ուզում. վերևում նստածներն էլ մեր նման են, էլի: Կարո՞ղ է` Մարսից են իջել: Պարզապես իրենք ավելի մեծ մասշտաբով են այդ խուլիգանություններն անում:

– Այսինքն` այնպես չէ, որ հիմա ասում ենք մենք փոփոխություններ ենք ուզում` միանգամից վերցրեցինք ու փոխվեցինք:

– Փոփոխություններ ես ուզո՞ւմ` փոխիր ինքդ քեզ:

Գոհար Սարդարյան