Առաջատար համալսարանների շուրջ 50 ուսանող հավաքվել են Հայաստանում

 Տասնմեկ երկրների առաջատար համալսարանների շուրջ 50 ուսանողներ հավաքվել են Հայաստանում՝ քննարկելու իրենց միավորող ու մտահոգող խնդիրները: Այս մասին «Արմենպրես»-ին տեղեկացրին ԵՊՀ-ից:

Քննարկման այդ յուրօրինակ հարթակը տրամադրել է ԵՊՀ ուսանողական խորհուրդը: «Ուսանողական կառույցների ազդեցությունը և դերը բարձրագույն կրթական համակարգում» խորագրով ուսանողական միջազգային ֆորումը ՈՒԽ-ն անցկացնում է արդեն 3-րդ անգամ՝ սկսած 2014 թ.-ից:

Նախկինում համաժողովի աշխատանքային լեզուն ռուսերենն էր, այս տարի այն անցկացվում է անգլերենով, ինչը խթանել է եվրոպական երկրների առավել մեծ թվով ուսանողների մասնակցությունը: Այս անգամ ուսանողներ են ժամանել Գերմանիայից, Իտալիայից, Հունաստանից, Իսպանիայից, Լիտվայից, Ուկրաինայից, Ռուսաստանից, Չինաստանից, Վրաստանից և այլն:

«Ի սկզբանե, երբ համաժողովը նախաձեռնում էինք, նպատակը մեր միջազգային կապերի ընդլայնումն ու դրսի փորձի ուսումնասիրությունն էր: Հատկապես եվրոպական երկրներում ուսանողական ինքնակառավարումը կազմակերպվում է մեզնից փոքր-ինչ այլ սկզբունքներով ու կառույցներով: Եթե ստացվի համախմբել հայաստանյան բոլոր բուհերին մեկ գաղափարի շուրջը, այդ երկրների մոդելները կարող ենք մեզ մոտ էլ տեղայնացնել»,- ասում է ԵՊՀ ուսանողական խորհրդի նախագահ Ռաֆֆի Քարամյանը:

Բացման արարողությունը տեղի ունեցավ այսօր ԵՊՀ-ում, իսկ բուն համաժողովն անցկացվելու է Աղվերանում: Նախ մասնակից ուսանողներին ողջունեցին ԵՊՀ ռեկտոր Արամ Սիմոնյանն ու Ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը:

«Ուսանողները ակտիվ մասնակցում են համալսարանական գործունեության երեք ուղղություններին էլ՝ կրթություն, հետազոտություն, սոցիալական ծառայությունների մատուցում: Միջազգային այսպիսի միջոցառումները կարևոր են նախ մեր ուսանողների հմտությունների զարգացման տեսանկյունից, ինչն ամրագրված է նաև մեր բուհի զարգացման ռազմավարական ծրագրում»,- նշեց ԵՊՀ ռեկտոր Արամ Սիմոնյանը:  

Պրոռեկտոր Ռուբեն Մարկոսյանն էլ՝ որպես ԵՊՀ ՈՒԽ հիմնադիրներից մեկը, խոսեց կառույցի կարևորության, համալսարանի կառավարման մարմիններում ուսանողների ներկայացվածության ու զարգացող աշխարհում ուսանողների առջև ծառացած մարտահրավերների մասին:

Համաժողովի բացման արարողությունից հետո մասնակիցները շրջայց կատարեցին ԵՊՀ պատմության թանգարանով, ապա այցելեցին Մատենադարան: Իսկ Աղվերանում տեղացի և արտասահմանցի մասնակիցներից յուրաքանչյուրը կներկայացնի իր երկրի փորձն ու խնդիրները, կառանձնացնեն համընդհանուր մտահոգության առարկա դարձած հարցերը և կփորձեն դրանց լուծումներ առաջարկել: Այդ ամենից բացի՝ նախատեսվում են նաև թրեյնինգներ, որոնք վարելու են կրթական ոլորտի ներկայացուցիչները, այդ թվում նաև՝ Ռուբեն Մարկոսյանը:

Համաժողովի օրերին հանդիպումներ են նախատեսվում նաև կրթության և գիտության ոլորտը համակարգող բարձրաստիճան պաշտոնյաների հետ: