Ինչպես քաշ չհավաքել ձմեռային տոներին

Վիճակագրության համաձայն, ձմեռային տոներին մարդիկ 0.5-ից 6 կգ քաշ են հավաքում։ Արդեն ավելորդ քաշ ունեցողները հակված են ավելի շատ գիրանալու, քան նվազ քաշ ունեցողները։ Պատճառը ոչ միայն առատ սեղաններն են, այլեւ ակտիվության նվազումը, սեզոնային փոփոխությունները։

Ամերիկյան դիետոլոգների կարծիքով, քաշի 0,5-ից 1 կգ ավելացումը ձմռանը չպետք է մտահոգության եւ դիետայի առիթ դառնա, այդ քաշն ինքն իրեն կհեռանա գարնանը։ Քաշի ավելի լուրջ փոփոխությունները պահանջում են սննդի նկատմամբ լուրջ վերաբերմունք, հաղորդում է Kedem-ը։

Միջին տարիքի 120 հազար ամերիկացիների շրջանում հարցում անցկացնելով՝ գիտնականները պարզել են, ո ավելորդ քաշի գլխավոր մեղավորներն են քաղցրեղենը, ալկոհոլն ու կարտոֆիլը։ Մսային ուտեստները մեծ վնաս չեն հասցնում, բայց տոներին դրանք հաճախ ուղեկցվում են կարտոֆիլով եւ ալկոհոլով։ Դիետոլոգները պարզ միջոցներ են առաջարկում՝ հացը փոխարինել աղցաններով, չիփսերը՝ ընկույզով, երշիկի եւ ապուխտի փոխարեն անյուղ միս եւ ծովամթերքներ, օգտագործել փոքր ափսեներ եւ գավաթներ, գրանցել օրվա կերածը, կրճատել ալկոհոլի օգտագործումը, ցանկացած հնարավորության դեպքում դուրս գալ զբոսնելու, զբաղվել ակտիվ սպորտով։