Քաղաքական ուժերի համար ընդունելի է Ծառուկյանի վերադարձը

«Փաստ» օրաթերթը գրում է.

Ինչպես ցույց են տալիս քաղաքական դաշտում տեղի ունեցող վերջին իրադարձությունները, ԲՀԿ նախկին նախագահ Գագիկ Ծառուկյանի վերադարձը քաղաքական դաշտ՝ ակտիվ քաղաքականություն, դառնում է անխուսափելի: Արդյոք ԲՀԿ–ն կկարողանա՞ հասարակության մեջ վերականգնել նախկինում ձեռք բերված ու ինչ–որ չափով կորսված վստահությունը: «Փաստը» Ծառուկյանի վերադարձի թեմայով հանդիպեց որոշ պատգամավորների հետ:

Հարցի շուրջ նախ խոսեցինք ԱԺ ԲՀԿ խմբակցության պատգամավոր, խմբակցության քարտուղար Վահե Էնֆիաջյանի հետ, ով նշեց, որ մինչ օրս ծավալված քննարկումներից, հանդիպումներից, զանգվածային տարբեր ակցիաներից ու Գագիկ Ծառուկյանի խոսքը լսելուց հետո, եկել է եզրահանգման, որ ԲՀԿ նախկին ղեկավարը երբեք ու երբևիցե ժողովրդին հուսահատ չի անի:

«Կարծում եմ, Գագիկ Ծառուկյանի՝ ԲՀԿ վերադարձի պարագայում մեր շանսերը, հավակնությունները էականորեն փոխվելու են, ու մենք պայքարելու ենք ամենաբարձր նշաձողին հասնելու համար, թե ինչ արդյունքներ կունենանք՝ ժամանակը ցույց կտա, բայց մեր աշխատանքներն ուղղված են լինելու այդ նպատակին»,– ասաց Վ. Էնֆիաջյանը:
ԱԺ ՀՀԿ խմբակցության պատգամավոր, խմբակցության քարտուղար Գագիկ Մելիքյանն էլ չցանկանալով խոսել դեռ տեղի չունեցած զարգացումների շուրջ, այնուամենայնիվ, ասաց, որ ՀՀ ցանկացած ակտիվ քաղաքացի կարող է քաղաքական գործունեություն ծավալել, եթե ցանկանա: «Ես լավ եմ վերաբերվում բոլորին, այդ թվում նաև՝ նրա վերադարձին»,– ասաց նա՝ պատասխանելով հարցին, թե արդյոք Գագիկ Ծառուկյանի քաղաքականություն վերադարձից հետո ՀՀԿ–ն կրկին կպայքարի «չարիքի» դեմ. «Ամեն ինչ փոխվում է, ամեն ինչ հոսում է: Ամեն ինչ նորովի է պետք տեսնել: Որևէ նեղացվածություն Գագիկ Ծառուկյանից չկա, մուռ պահել չկա»:
Խոսելով ԲՀԿ–ի հնարավոր հաջողությունների մասին՝ նշեց. «Սպասենք, կտեսնենք, թե ԲՀԿ–ն որ տեղը կզբաղեցնի նոր պառլամենտում: Այն, որ ՀՀԿ–ն առաջին տեղում է լինելու՝ վստահ եմ»:

ՕԵԿ խմբակցության ղեկավար Հեղինե Բիշարյանը ևս գտնում է, որ հնարավոր զարգացումների մասին խոսելը դեռ վաղ է. «Գուշակություն կլինի ասել, թե Գագիկ Ծառուկյանի վերադարձն անխուսափելի գործընթաց է կամ՝ հակառակը, որովհետև դա անձերի որոշելիք է: Նա ինքը պետք է որոշի վերադառնալու է ակտիվ քաղաքականություն, թե՝ ոչ»,– ասաց նա՝ հավելելով, որ քաղաքական մեծ իրադարձություններ են եղել՝ կապված ԲՀԿ–ի և Գագիկ Ծառուկյանի հետ. «Երբ տեղի է ունենում իրադարձություն, ժողովուրդն իր գնահատականների մեջ ինչ–որ բան փոխում է: Թե ինչ արձագանք կտա ժողովուրդը՝ պարզ կլինի, երբ Գագիկ Ծառուկյանը ակտիվ քաղաքականություն վերադառնա»:

Խոսելով Գագիկ Ծառուկյանի վերադարձից հետո ԲՀԿ–ի հնարավորությունների և 2017 թվականին ձևավորվելիք պառլամենտի մասին, պատգամավորը նկատեց. «Նախընտրական փուլ չենք մտել, թեպետ այս ժամանակահատվածում քաղաքական ուժերն ակտիվ աշխատում են: Այդ ակտիվ աշխատանքի արդյունքում ժողովրդի մոտ կամաց–կամաց ձևավորվում է գնահատական քաղաքական ուժերի նկատմամբ: Այս պահին դեռևս շուտ է, որ որևէ քաղաքական ուժի մասին որևէ բան ասենք: Որոշ ժամանակ անց շատ ավելի հեշտ կլինի գնահատել»:
ՀԱԿ խմբակցության պատգամավոր Լյուդմիլա Սարգսյանն էլ իր խոսքում նշեց, որ ԲՀԿ–ի քաղխորհրդի նիստում ընդունած արձանագրությունը շատ ավելի խորքային հիմքեր ունի: «Տեղյակ եմ, որ ԲՀԿ տարբեր կառույցներ վեր են հանում ու փորձում են Գագիկ Ծառուկյանին առաջարկել վերադառնալ քաղաքական դաշտ, ու որ նա գլխավորի ԲՀԿ–ն: Ըստ իս՝ պահանջը պայմանավորված է նրանով, որ Գագիկ Ծառուկյանն այնպիսի մասսայական բարեգործություններ է իրականացնում, որ ժողովրդի հետ ամենօրյա շփումը բերել է նրան, որ նա իրոք անհրաժեշտ է քաղաքական դաշտին: Նրա վերադարձն անխուսափելի է հանրային պահանջի առումով: Ես համարում եմ, որ եթե անձը պահանջված է ու տվյալ անձը գիտակցում ու տեսնում է այն բացը, որն առաջացել է իր գնալուց հետո, ու որը չի լրացվել, բնականաբար, նա պետք է մտածի իր վերադարձի մասին»:

Ինչ վերաբերում է Գագիկ Ծառուկյանի նկատմամբ վստահության ձևավորմանը, ապա. «Նրա նկատմամբ երբեք էլ չի խաթարվել, պարզապես մարդկանց տրամադրություններն իրադարձությունների զարգացման ընթացքում անկումային էին, բնականաբար, այն հույսերը, որոնք կապվում էին ոչ միայն Գագիկ Ծառուկյանի հետ, այլ ընդհանրապես եռյակի գործունեության հետ՝ չիրականացան: Քանի որ իրադարձությունները ծավալվում էին նրա շուրջ, հետևաբար պահանջներն էլ էին խիստ, սակայն դա չի նշանակում, որ վստահությունը նրա նկատմամբ խաթարվել էր: Գագիկ Ծառուկյանն այդ պարագայում չէր կարող այլ բան անել, քան հայտարարել իր հեռանալու մասին, հակառակ դեպքում` անխուսափելի զարգացումներ կլինեին: Նկատենք, որ քաղաքական եռյակն այդ ժամանակ, կարծես, ակտիվ չսատարեց Գագիկ Ծառուկյանին: Ստացվում էր, որ Ծառուկյանը շարժման ողջ պատասխանատվությունը պետք է վերցներ իր վրա, իսկ թիկունքը «դատարկ» էր: Նրա որոշումը ճիշտ էր, նա չցանկացավ արյունահեղություն: Հեռացումը պայմանավորված էր իրավիճակով ու վերադարձն էլ կլինի իրավիճակով ու հանրային պահանջով»,– ասաց պատգամավորը՝ խոսելով ԲՀԿ–ի հետագա շանսերի մասին:

Շարունակությունը` «Փաստ» օրաթերթի այսօրվա համարում: