Անի Դաշյան. Տոնական հարցազրույց և տոնական ֆոտոշարք

Կարոտած ողջույններ և մի գիրկ ջերմություն Անի Դաշյանից: Ամուսնությունից հետո Մոսկվայում բնակություն հաստատած հաղորդավարուհու համար առանձնահատուկ էր ոչ միայն նախորդ Ամանորը, այլև՝ գալիքը…

 

Անին մեզ տրամադրել է իր գեղեցիկ և երջանիկ ընտանիքի առաջին համատեղ ամանորյա ֆոտոշարքն ու խոսել տոնի մասին:

 

-Սիրո՞ւմ ես Ամանորը:

-Այո, ինչպես մնացած բոլոր տոները:

 

-Ինչպե՞ք եք սովորաբար նշել տոնը և ինչպե՞ս է այն անցել վերջին երկու տարիներին:  

-Քանի որ Նոր տարին ընտանեկան տոն է, սովորաբար ընտանիքիս հետ եմ նշել: Նախորդ տարի առաջին անգամ տոնին ամուսնուս հետ եմ եղել՝ մեր առաջին համատեղ Ամանորին: Այս տարի էլ առաջին անգամ մեր փոքրիկ հրաշքի հետ ենք նշելու, չնայած նախորդ տարի ևս Ռոբերտս մեզ հետ էր, միայն թե՝ դեռ մամայի փորիկում:

 

 

-Հավատո՞ւմ ես Ձմեռ պապիկին:

-Ինչպե՞ս չհավատալ մի բանի, որն իրականություն է: Այո, Ձմեռ պապիկ կա, գոյություն ունի: Համենայնդեպս՝ նա ամեն տարի հիշում է ինձ և պատասխանում իմ նամակներին: Իմ Ձմեռ պապան ամենալավն է 

 

-Պատմելո՞ւ ես Ռոբերտին Ձմեռ պապիկի մասին:

-Իհարկե, ավելին՝ արդեն պատմել եմ և ասել եմ, որ պետք է միասին նամակ գրենք նրան:

 

 

-Ինչպե՞ս ես պատկերացնում իդեալական տոները:

-Իդեալական տոները պետք է լինեն առանց տանջանքի: Ճիշտ է, երբ ես դեռ չէի ամուսնացել, շատ հաճելի էր, որ մայրս համեղ ուտեստներ, աղցաններ և տեսակ-տեսակ խմորեղեն էր պատրաստում, որը բոլորս վայելում էինք, բայց ինչպես հայ կանանց մեծամասնությունը, Ամանորի շեմին նա արդեն ուժասպառ էր լինում, դեռ մի բան էլ առաջինն ինքն էր տոնական տեսքով, ժպիտով և բարձր տրամադրությամբ պատրաստ լինում գալիք տարին դիմավորելուն: Իհարկե, հայ մայրերը բոլոր առումներով հերոսներ են, բայց շատ կուզեի, որ նրանք էլ լիարժեք վայելեն տոները. 1000 տեսակի փոխարեն կարելի է պատրաստել, օրինակ, 100 տեսակ  Հ.Գ Շաաատ եմ կարոտել մամայիս Նոր տարվա սեղանը 

 

 

 

-Դու ինքդ ինչպե՞ս ես գլուխ հանում «տոնական եփութափից»:

-Ամեն ինչ էլ կարողանում եմ պատրաստել, ինչպես ասում են՝ «ձեռքիցս գալիս է», բայց Ամանորին պատրաստում եմ քիչ չափաբաժնով՝ միայն այդ օրվա համար. Մոսկվայում Երևանի նման մինչև լուսաբաց հյուրեր չենք ունենում 

 

-Կա՞ն ուտեստներ, որոնք անպայման պետք է լինեն տոնական սեղանին:

-Երևի թե «Մայրաքաղաքային» աղցանը՝ «Օլիվյե»-ն: Ես էլ եմ շատ սիրում, ամուսինս էլ: Նաև ամուսնուս համար լոբով աղցան եմ պատրաստում, որը միշտ եղել է նրանց տան տոնական սեղանին:

 

 

-Ի՞նչ երազանք ես պահելու տոնի գիշերը:

-Երազանքների մասին չեն բարձրաձայնում, որպեսզի դրանք իրականան, Անժելա /սպասում էի այս պատասխանին, բայց փորձը փորձանք չէ – Ա.Մ./: Արդեն գիտեմ, թե ինչ երազանք եմ պահելու և խոստանում եմ պատմել, հենց իրականանա:

 

-Ինչպե՞ս ես վերաբերվում Ամանորի հետ կապված զանազան ավանդույթ-սնահավատությունների:

-Տոնի հետ կապված ավանդույթներից շատերին հետևում եմ, օրինակ՝ տոնածառի առաջին խաղալիքը կախելիս երազանք եմ պահում, ինչ վերաբերում է սնահավատություններին՝ սնահավատ չեմ:

 

 

Հ.Գ. Երազանք բառի գերակայությունը տոնի տրամադրվածության նշան է: Ուրախ տոներ բոլորիս: Թող իրականանան ոչ միայն այս գեղեցիկ ընտանիքի, այլև բոլոր-բոլորիս երազանքները: Հիշեք՝ Ամանորի շեմին անհնարին ոչինչ չկա: