Միհրան Ծառուկյանի «կռիվը» Շուշաննա Թովմասյանի և «սերը» Արփի Գաբրիելյանի հետ. ի՞նչ դասեր է քաղել երգիչը

Երգիչ Միհրան Ծառուկյանի անձնական կյանքը միշտ եղել է քննարկման կիզակետում։ Լիլիթ Հովհաննիսյան, Մերի Մակարյան, Շուշաննա Թովմասյան, հիմա էլ Արփի Գաբրիելյան. սրանք հանրությանը հայտնի այն կանայք են, ում հետ լսարանը կապել է Միհրանի անունը։ Նշվածներից ում հետ է Միհրանն իրապես կապ ունեցել, ում հետ՝ ոչ, հարցի այլ կողմն է. այսօր կանդրադառնամ նրանցից երկուսին՝  Շուշաննային և Արփիին, կամ ինչպես Միհրանը ձախողեց «Դժվար ապրուստի» բերած հաջողությունն ու ինչպես է հիմա սխալների ուղղում անում։

Փառքի հասնելուց հետո Միհրանը մի շարք սխալներ թույլ տվեց PR տեսանկյունից, ինչի արդյունքում նրա «աստղը» շատ արագ մարեց։ Միհրանին կարելի է դասել այն երգիչների շարքին, ովքեր, հասնելով փառքի, կարծում են, որ այն հարատև է լինելու և չեն աշխատում այն պահելու ուղղությամբ: Հայտնիներն ընդունեն, թե՝ ոչ, PR-ը շատ կարևոր է, և հանրային մարդու դեպքում ոչ թե PR-ով զբաղվելն է ամոթ, այլ չզբաղվելը։

Երբ Միհրանի նկատմամբ հետաքրքրությունն աճեց, նա որոշեց, որ պետք է լինի սրտակերի կարգավիճակում և չնկատեց, որ հասարակությունն իրեն սիրում է Շուշաննա Թովմասյանի կողքին՝ իր կերպարի մեջ։ Երգչի նկատմամբ լսարանի ուշադրությունը շատ էր մեծացել «Դժվար ապրուստից» հետո, և որքան էլ Միհրանը հերքի այս փաստը, իրեն ընկալում էին որպես «Դժվար ապրուստի» Գոռ, ոչ թե երգիչ Միհրան Ծառուկյան։ Սերիալի ընթացքում և նույնիսկ դրանից հետո թեժ քննարկումներ կային, թե գլխավոր հերոսներ Միհրան Ծառուկյանն ու Շուշաննա Թովմասյանը սիրավեպ ունեն։ Անգամ այն հանգամանքը, որ նրանք քանիցս հերքել էին այդ լուրերը, որևէ ազդեցություն չէր ունենում: Հասարակությունը համառորեն պնդում էր, որ Միհրանն ու Շուշաննան գաղտնի սիրավեպ ունեն: Իրականում հերոսների միջև ոչ միայն անձնական կապ չկար, այլև նրանց հարաբերությունները բավականին լարված էին, և Միհրանը հարցազրույցներում այնպիսի արհամարհանքով էր խոսել Շուշաննայի մասին, որ հետո ստիպված էր եղել «մեղքերի թողություն» անել։

Ինչ խոսք, Միհրանը կարող էր հերքել իր և խաղընկերուհու սիրային կապը, սակայն պետք չէր ի ցույց դնել, որ ինքն ու Շուշաննան երբեմն նույնիսկ չեն բարևում իրար, նկարահանման հրապարակում մթնոլորտը, մեղմ ասած, լարված է, նաև պետք չէր հրաժարվել գործնական շփումներից։ Եթե Շուշաննան առերևույթ պարբերաբար ցույց էր տալիս իր դրական վերաբերմունքը գործընկերոջ հանդեպ, Միհրանը երբեմն կարող էր նույնիսկ կոպիտ լինել։ Երբ դերասանուհին ֆեյսբուքյան իր էջում նոր ալբոմ բացեց, որտեղ տեղադրեց «Դժվար ապրուստ» հեռուստասերիալի նկարահանումների ժամանակ արված լուսանկարները, որտեղ ինքն ու Միհրանը՝ որպես Էլեն և Գոռ, բավականին մտերմիկ միջավայրում էին, խոսակցությունների նոր ալիք բարձրացավ։ Շուշաննան ասաց, որ այդ լուսանկարները տեղադրել է համապատասխան ալբոմում՝ ի նշան շնորհակալության իր երկրպագուներին, ովքեր պատրաստել են այդ լուսանկարներն ու տարածել ֆան-էջերով: Նրա քայլին հաջորդեց Միհրան Ծառուկյանի հարցազրույցը, որում նա ասել էր, թե չի հասկանում՝ ինչու է Շուշաննան տեղադրել այդ նկարները։ Երգիչը նաև ասել էր, որ իր և Շուշաննայի միջև կապ չկա և չի կարող լինել: Միհրանի այս հայտարարությունը բացասական ընկալվեց երկրպագուների կողմից, և նա ստիպված եղավ բացատրություն գրել ֆեյսբուքյան իր էջում՝ նշելով, որ դա չի ասել որևէ բացասական կամ հետին մտքով:

Միհրանը հրաժարվում էր իրեն և Շուշաննային առաջարկվող համատեղ ֆոտոշարքերից, նախագծերից, որպեսզի պահեր սրտակերի համբավը և չէր հասկանում, որ տվյալ պահին ինքը հետաքրքիր էր հենց անձնական կապի ինտրիգով։ Արդյունքում եղավ ճիշտ հակառակը. երկրպագուների զգալի մասը հիասթափվեց նրա պահվածքից, նրա քայլերը որակեց ոչ տղամարդավայել և երես թեքեց նրանից։

Միհրանին բախտը կրկին ժպտաց, երբ նա սկսեց նկարահանվել «Ֆուլ հաուս» նախագծում։ Այն բարձր ռեյթինգ ունեցավ, Միհրանն էլ սիրվեց նոր կերպարում։ Հիմա էլ պարբերաբար խոսակցություններ են պտտվում, որ Միհրանն ընկերություն է անում խաղընկերուհու՝ Արփի Գաբրիելյանի հետ, ում հետ «Ֆուլ հաուսի» այս եթերաշրջանում զարգանալու է նրա սիրային գիծը։ Հաշվի առնելով, թե լսարանն ինչքան ինքնասածի է և համոզված իր պնդումներում՝ ենթադրում եմ, որ այս անգամ էլ են խոսակցությունները պարբերաբար շարունակվելու, թեև Միհրանն ու Արփին արդեն հերքել են միասին լինելու մասին լուրերը։

Այս անգամ Միհրանը, կարծես թե, դասեր է քաղել միայնակ սրտակեր լինելու անհաջող փորձից ու այժմ չի հրաժարվում էքսպերիմենտներ անել Արփիի հետ։ Եթե Շուշաննայի հետ նա կռիվ էր տալիս, Արփիի հետ «սեր» է խաղում։ Երգիչը չի հրաժարվել «Ֆուլ հաուսից» դուրս էլ համագործակցել Արփիի հետ և զուգերգ կատարել խաղընկերուհու հետ, ավելին՝ տեսահոլովակում նրանք ներկայանալու են որպես ամուսնական զույգ, համացանցն էլ արդեն ողողվել է նրանց «հարսանիքի» մասին հրապարակումներով։ Արփիի հետ ավելի բարվոք հարաբերություննե՞րն են պատճառը, թե՞ Միհրանն իսկապես հասկացել է, որ երբեմն պետք է երկրպագուների սրտով գնալ, երբեմն ինտրիգ ստեղծել, երբեմն էլ քննարկումների տեղիք տալ, սակայն փաստն այն է, որ այս անգամ ստեղծված իրավիճակը երգիչը հօգուտ իր վարկանիշի է օգտագործում, համենայն դեպս՝ առայժմ։