Բացասական միտումները խեղդել են մեզ, ուստի ճիշտ չէ ռիսկի դիմել և արևի քաղաք նկարագրել. «Փաստ»

«Փաստ» օրաթերթը գրում է.

2017–ի բյուջեի մասին զրուցում ենք տնտեսագետ Վարդան Բոստանջյանի հետ

– Երեկ ԱԺ–ում երկրորդ ընթերցմամբ ընդունվեց 2017–ի բյուջեի նախագիծը: Ըստ Ձեզ, կառավարությունն ի՞նչ բյուջե է ներկայացրել: Դրա հիմնական բացասական և դրական կողմերը որո՞նք են:

– 2017–ի բյուջեն չափազանց զուսպ է, բայցև նման բյուջե ունենալով` մենք գտնվում ենք իրատեսության դաշտում: 2016–ի կտրվածքով տնտեսությունում առկա են տարբեր խոցելի հատվածներ: Մասնավորապես, մինչև տարեվերջ բյուջետային մուտքերի մասով կանխատեսվում է գրեթե 100 մլրդ դրամի չափով թեր հավաքագրում: Դա չափազանց մեծ գումար է Հայաստանի համար: Ու դա նշանակում է, որ այդքան ծրագրեր մենք չենք կարողանում իրականացնել ընթացիկ տարում: Բնականաբար, նման իրավիճակից ելնելով հնարավոր չէր ներկայացնել մի բյուջե, որը պետք է մեզ խոստանար չափազանց մեծ առաջընթաց: Ուստիև 2017–ի բյուջեն համարում եմ իրատեսական: Իսկ ինչ վերաբերում է դրա գործառույթներին կամ դրանում ներառված ծրագրերին, կարող եմ ասել, որ դրանց միջոցով նախադրյալներ են ստեղծվում տնտեսական հետագա վերելք ապահովելու համար: Դրանք հետագա առաջընթացի հիմք են պատրաստում:

– Ընդդիմությունը հակադարձում է, որ գրվել է այնպիսի բյուջե, որը հեշտ է կատարել: Կառավարությունը իր համար վերին նշաձողեր չի սահմանել:

– Ըստ էության, ընդդիմությունը սխալ չի ասում: Սակայն ավելի համարձակ և ավելի մեծ ցուցանիշներով բյուջեն կարող է ամեն ինչ ուղեծրից դուրս բերել: Այս պահին բացասական միտումները, ըստ էության, խեղդել են մեզ: Նման պարագայում դիմել ռիսկի և նկարագրել արևի քաղաք, այնքան էլ ճիշտ չէ… Ես, օրինակ, հակված չեմ տեսնելու «Նյու Վասյուկի», համաձայն որի այս ծանր վիճակից հետո 2017–ին կլինի կտրուկ առաջընթաց: Դա գրեթե անիրատեսական է: Այդ առումով չէի ցանկանա համաձայնվել ընդդիմության հետ: Բայց միևնույն ժամանակ հասկանալի է, որ ընդդիմությունը պետք է առաջարկեր ավելի համարձակ բյուջե:

– Ինչո՞ւ:

– Ցանկացած վատացում պահանջում է համարձակություն, ռիսկի մեծ բաժին հատկապես պետության կողմից: Իսկ դա ոչ այլ ինչ է, քան ամենատարբեր առաջնահերթ ու կարևոր ծրագրերի իրականացում: Ցավոք, 2017–ի բյուջեում մենք դա չենք տեսնում:

– Խորհրդարանական ընդդիմությունը դեմ է քվեարկել բյուջեի նախագծին: Սա նախընտրակա՞ն քայլ է:

– Ավելի շուտ պետք է այդպես որակել: Թեպետ չկասկածեք, որ ընդդիմության բոլոր ներկայացուցիչները, բնականաբար, ուզում են ունենալ լավ, արդյունավետ բյուջե: Բայց դրան զուգահեռ գործում են քաղաքական մոտեցումները, առավել ևս, որ նախընտրական ժամանակահատվածում ենք գտնվում: Ուստիև ընդդիմության նման կեցվածքը բնական եմ համարում:

– Փաստորեն ՀՀԿ խմբակցության ղեկավարը ճիշտ էր, որ այս տարվա բյուջեի բախտը չբերեց, որ նախընտրական շրջանի հետ համընկավ:

– Կարելի է այդպես էլ ասել:

Շարունակությունը` «Փաստ» օրաթերթի այսօրվա համարում: