Ծովագյուղի գործարանը կվերամշակի նաև Գեղարքունիքի և այլ մարզերի տնտեսություններում աճեցված հնդկացորենը

Ժամում 1 տոննա հնդկացորենի հումքի վերամշակման հզորություն ունեցող գործարանը, որն ընդամենը օրեր առաջ է բացվել Գեղարքունիքի մարզի Ծովագյուղ համայնքում և առայժմ միակն է Հայաստանում, առայժմ վերամշակվում է իրենց համայնքում այս տարի 105 հեկտարի վրա աճեցված հնդկացորենի բերքը, որը կազմում է ավելի քան 100 տոննա: Ինչպես «Արմենպրես»-ին տեղեկացրեց  հնդկաձավարի վերամշակման  գործարանի գործադիր տնօրեն Արտաշես Խալաֆյանը, իրենց համայնքի բերքի ողջ քանակի վերամշակումից հետո գործարանը վերամշակման կընդունի նաեւ Գեղարքունիքի մարզի եւ Հայաստանի մի շարք այլ մարզերի տնտեսություններում աճեցված հնդկացորենը: Մեկնարկում գործարանում բացվել է 10 աշխատատեղ: Գործարանը բացվել է Եվրոպական Միության կողմից իրականացվող ԷՄՊԱՐԴ ծրագրի շրջանակներում:

«Այս տարի մենք մեր համայնքում նախկինում անմշակ մնացած վարելահողերից 105 հեկտար տարածքում կատարեցինք հնդկացորենի ցանք: Մեկ հեկտարից ակնկալում էինք մինչեւ 2-2,5 տոննա բերք, սակայն բերքի որոշ մասը կարկտահարվեց, ինչի հետեւանքով բերքատվությունը նվազեց՝ հեկտարից ապահովելով մինչեւ 1,5 տոննա: Կարողացանք հաջողությամբ հավաքել բերքը, այն չորացնել, եւ այժմ ենթարկում ենք վերամշակման: Գործարանի շենքը կառուցվեց մեր համայնքի միջոցներով, իսկ սարքավորումներն անվճար տրամադրեց ԷՄՊԱՐԴ ծրագիրրը: Նույն ծրագրի կողմից մեզ անվճար տրամադրվել էր նաեւ սերմացուն»,- ներկայացրեց Արտաշես Խալաֆյանը:

Ըստ նրա՝ հումքի վերամշակումն  անցնում է տեսակավորման  երկու փուլ՝ սերմի եւ հնդկաձավարի առանձնացման: Հնդկացորենը վերամշակվում  է՝ վառարաններում 250 աստիճանի տակ ջերմային մշակման անցնելով: Ապա այն անցնում է կոտրման սարքի միջով, որտեղ էլ ջարդվում  եւ դուրս է գալիս միջուկը՝ բուն հնդկաձավարը, որից էլ առանձնացվում է սերմացուն եւ սննդամթերքը: Սերմացուն   պահեստավորվում է, սննդամթերքը՝ փաթեթավորվում: Հնդկացորենի ջարդումից առաջացած կեղեւի թեփն օգտագործվում է որպես վառելիք՝ հնդկացորենը ջերմայյին մշակման ենթարկելու համար: &la quo;Այս դեպքում ունենք անթափոն արտադրություն: Վառարաններում նաեւ փայտ ենք վառում, սակայն ավելի շահավետ կլինի անցնել բնական գազի օգտագործման: Մի քանի օրից տեղ կհասնեն նաեւ փաթեթավորման հաստոցները, եւ մենք սննդամթերքը փաթեթավորված տեսքով կառաքենք խանութներ: Հնդկացորենի արտադրության 1 կիլոգրամի ինքնարժեքը 1 հեկտարից մինչեւ 2,5 տոննա բերքատվության դեպքում կկազմի մինչեւ 250 դրամ: Այն տեղական շուկայում կարող ենք վաճառել 350 եւ ավել դրամ արժեքով, մանավանդ  որ մեր հողերի վրա աճեցված բերքը համով  ու սննարարությամբ գերազանցում է ներկրված հնդկ աձավարին, ուստի համզոված եմ, որ  մենք հաջողություն կունենանք՝ ապահովելով կայուն եկամուտներ ու զարգացման հեռանկարներ»,- հավաստեց գործարանի տնօրենը:

Ըստ տնօրենի՝ Հայաստանում հնդկաձավարի սպառման տարեկան պահանջարկը կազմում է մոտ 9 հազար տոննա, որը հիմնականում ներկրվում է տարբեր երկրներից: Այս տարի Գեղարքունիքում եւ այլ մարզերում արտադրված հնդկացորենը վերամշակման դեպքում կարող է բավարարել ընդհանուր  պահանջարկի 5 տոկոսը: Վերամշակման գործարանի առկայությունը մեծապես կխթանի հնդկացորենի ցանքերի ընդարձակում: «Մենք  եկող տարի նախատեսել ենք 105 հեկտարից հնդկացորենի ցանքերը հասցնել մինչեւ 400 հեկտարի: Մարզի մի շարք համայնքներում  եւս  կզբաղվեն հնդկացորենի մշակությամբ՝ համոզված լինելով, որ բերքի իրացման խնդիր չեն ունենա: Առաջիկա տարիների ընթացքում ծրագրված է Գեղարքունիքի մարզում հնդկացորենի ցանքերը հասցնել մինչեւ 3 հազար հեկտարի: Նման ծավալների բերքի վերամշակման համար մեզ արդեն անհրաժեշտ կլինի աշխատել շուրջօրյա, մի քանի հերթափոխով, մինչեւ 20-30 աշխատատեղով: Արտադրության ծավալների ընդարձակման դեպքում մեզ հարկ կլինի ունենալ 2 նորագույն հատիկահավաք կոմբայն, շարքացան եւ պահեստային մասի կառուցում, որի համար էլ մենք հայրենի կառավարությունից կխնդրենք վարկային համապատասխան միջոցների տրամադրում»,-նշեց Արտաշես Խալաֆյանը: