Լուսին «Դեպի Եվրատեսիլ»-ում ամենաքիչ ձայները հավաքելու և իր ֆավորիտ մասնակցի մասին

Առաջին ալիքով հեռարձակվող «Դեպի Եվրատեսիլ» նախագծի նախընտրական փուլի առաջին կիսաեզրափակչում մասնակցող 6 արտիստներից ընտրվեցին 4-ը՝ Մարտան, Արծվիկը, Սյուզաննա Մելքոնյանը և Իջինը: Արամ MP3-ի և Իվետա Մուկուչյանի խմբի անդամները՝ Լուսին և Վահե Ալեքսանյանը ժյուրիի և sms քվեարկության արդյունքում հավաքված ցածր միավորների պատճառով դուրս մնացին: Tert.am Life-ը Լուսիի հետ զրուցել է նախագծից դուրս մնալու և առաջիկա անելիքների մասին:

 -Լուսի, կպատմե՞ք «Դեպի եվրատեսիլ» նախագծում Արամի հետ աշխատանքի մասին, նա այս ընթացքում ի՞նչ տվեց Ձեզ:

 -Արամի հետ աշխատելուց ինձ շատ լավ եմ զգում: Շատ հաճելի է նման արտիստի հետ աշխատելը: Նա ինձ տվեց ավելի ինքնավստահություն և աշխատասիրություն:

 -Հնարավո՞ր է համագործակցություն ներկայացնեք Արամի հետ:

 -Առայժմ չկա նման բան, հետագայում՝ չգիտեմ: 

 -Ի՞նչ էիք զգում նախքան քվեարկության ավարտը: Ի՞նչ կանխատեսումներ ունեիք:

 -Անկեղծ ասած ոչ մի բան: Ուղղակի վայելում էի այդ ընթացքը:

 -Ձեզ համար վիրավորական չէ՞ր, որ և´ հեռուստադիտողների կողմից քիչ ձայներ ստացաք, և´ ժյուրիի ամենացածր գնահատականը:

 -Ես մասնակցել եմ «Դեպի եվրատեսիլ» նախագծին և պատրաստ եմ եղել յուրաքանչյուր պարտության. չէ՞ որ սա մրցույթ է:

 -Ըստ Ձեզ՝ ո՞րն էր չանցնելու պատճառը, ավելիի՞ն էիք արժանի:

 -Եթե իմանայի՝ ովքեր են ժյուրիի անդամները միանգամից կկռահեի, որ կողմից եմ թերացել: Չգիտեմ՝ ովքեր են ժյուրիի անդամները:

 -Թողարկման ընթացքում ամուսինդ ասաց, որ եթե չանցնես հաջորդ փուլ,  մյուս տարի կփորձես մասնակցել Եվրատեսիլին: Խոսե՞լ էիք հավանական անկման մասին:

 Այո ասել է, տեսնենք՝ ինչպես կլինի :) Բնական է՝ մտածել էինք չանցնելու տարբերակի մասին: Այդ իսկ պատճառով պատրաստ էինք:

 -Այս արդյունքը ընկճե՞լ է Ձեզ:

 -Բացարձակ: Ընդհակառակը, ավելի է ուժեղացրել ու նոր շունչ տվել:

 -«Դեպի Եվրատեսիլ»-ը կստիպի՞ Ձեզ ինչ-որ բաներ վերանայել:

 -Եթե չանցա, ապա այնքան համապատասխան չեմ եղել, որքան մնացած 4 մասնակիցները: Պետք է էլ ավելի աշխատել:

 -Մյուս մասնակիցներից ո՞ւմ եք տեսնում «Եվրատեսիլի» բեմում՝ որպես Հայաստանը ներկայացնող արտիստ:

 -Ունեմ իմ ֆավորիտը, իհարկե դա իմ կարծիքն է, բայց այս պահին Մարտային եմ տեսնում:

 -Առաջիկայի համար ի՞նչ նորություններ են սպասվում Ձեզանից:

 -Շուտով կներկայացնեմ իմ նոր տեսահոլովակը, այնուհետև կմեկնեմ ԱՄՆ՝ գործուղման: Կան երգեր, որոնք նախատեսում եմ ներկայացնել հաջորդ տարվա ընթացքում: