Ինչպես են աշխատում ԱԺ պատգամավորները. «Փաստ»

«Փաստ» օրաթերթը գրում է.

«Փաստի» այսօրվա համարում կանդրադառնանք Հանրապետական կուսակցության անդամներ Վոլոդյա Բադալյանին, Մանվել Բադեյանին, Վահրամ Բաղդասարյանին և Կարեն Բեքարյանին: Նշված պատգամավորների մեջ ամենից շատ կողմ քվեարկել են Վոլոդյա Բադալյանն ու Վահրամ Բաղդասարյանը, համապատասխանաբար՝ 874 և 862 անգամ: Համեմատաբար քիչ են դրական քվեարկել Մանվել Բադեյանն ու Կարեն Բեքարյանը, առաջինը՝ 526, իսկ երկրորդը՝ 344 անգամ:
Թվարկված բոլոր պատգամավորներն էլ բավական քիչ են դեմ քվեարկել՝ 4,7,9–ն անգամ, իսկ Բեքարյանն էլ ըստ www.parliamentmonitoring.am կայքի՝ ընդհանրապես այս չորս տարիների ընթացքում ոչ մի անգամ դեմ չի քվեարկել: Հանրապետական կուսակցության պատգամավորներից միայն Մանվել Բադեյանն է, ով քվեարկելուց ձեռնպահ է մնացել 123 անգամ: Մյուս պատգամավորները կամ ձեռնպահ չեն մնացել կամ էլ՝ շատ քիչ: Ի դեպ, Բադեյանը առանձնանում է իր կուսակիցներից նաև նրանով, որ նրանց համեմատությամբ բավական շատ է բացակայել: Բադեյանը բացակայել է 93, Վահրամ Բաղդասարյանը 31, Վոլոդյա Բադալյանը 14, իսկ Կարեն Բեքարյանն էլ միայն մեկ անգամ:
Այս չորս պատգամավորներից միայն Վոլոդյա Բադալյանն է, ով ոչ մի անգամ ոչ ելույթ է ունեցել, ոչ էլ հարցեր տվել Ազգային ժողովում: Մնացած պատգամավորներից Վահրամ Բաղդասարյանն է իր ակտիվությամբ աչքի ընկնում, ով հարց է տվել 22 և ելույթ ունեցել 49–ն անգամ: Մանվել Բադեյանն ու Կարեն Բեքարյանն էլ համապատասխանաբար հարց են տվել 5 և 7 ու ելույթ ունեցել 3 և 2 անգամ:
Վոլոդյա Բադալյանը երկու օրենսդրական նախաձեռնության համահեղինակ է, որից մեկը վերաբերում է բյուջետային համակարգին, իսկ մյուսն էլ Հայոց ցեղասպանության 100–րդ տարելիցի վերաբերյալ հայտարարությունն է եղել: Բադալյանի դրամական միջոցները վերջին չորս տարիների ընթացքում նվազել են՝ 137 միլիոն 517 հազար դրամից դառնալով 97 միլիոն դրամ: 
Մանվել Բադեյանը միայն մեկ նախաձեռնության համահեղինակ է, այն է՝ առողջապահական ոլորտի վերարտադրողական առողջության վերաբերյալ: Ի տարբերություն նախորդ պատգամավորի՝ Բադեյանը իր պատգամավոր լինելու տարիներին կարողացել է գրեթե կրկնապատկել ունեցվածքը: Այսպես, եթե նա 2012 թ. ուներ 758 միլիոն 996 հազար դրամ, ապա ըստ նրա 2015 թ. հայտարարագրի՝ նա ունի 1 միլիարդ 107 միլիոն 241 հազար դրամ:
55–ամյա պատգամավոր Վահրամ Բաղդասարյանը թվով ինն օրենսդրական նախաձեռնությունների համահեղինակ է՝ պետաիրավական, հարկային, կրթական և հանրային հարցերի ոլորտների վերաբերյալ: Բաղդասարյանի դրամական միջոցները իր պատգամավորական մանդատն ստանալու և 2015 թ. հայտարարագրի տվյալներով նվազել են՝ 9 միլիոն 53 հազարից դառնալով 5 միլիոն 386 հազար դրամ:
Կարեն Բեքարյանը իր վերոհիշյալ գործընկերներից միակն է, ով երբևէ որևէ օրենսդրական նախաձեռնությամբ հանդես չի եկել: Նախաձեռնությունների՝ այդ թվում «1000 դրամների», ԱԺ կանոնակարգի և 2017 թ. պետբյուջեի վերաբերյալ, 99,42%–ին դրական քվեարկած պատգամավորը 2015 թ. դրությամբ ունի միայն 1 միլիոն դրամ և 3 միլիոն 527 հազար դրամ եկամուտ:

Շարունակությունը` «Փաստ» օրաթերթի այսօրվա համարում: