Գերմանիայի դիվանագիտական անձնագիր ունեցող անձինք դժվարությունների են հանդիպում Թուրքիայում

Թուրքիայի մեջլիսի փոխնախագահին փաստաթղթեր չունենալու պատճառով Գերմանիայի Քյոլնի օդանավակայանում սպասեցնել տալուց հետո պաշտոնական Անկարան շարունակում է Թուրքիայի օդանավակայաններում դժվարություններ ստեղծել Գերմանիայի դիվանագիտական անձնագիր ունեցող անձանց համար:

Ինչպես հաղորդում է «Արմենպրես»-ը, գերմանական Deutsche Welle պարբերականի տվյալներով` միջադեպից հետո Գերմանիայի դիվանագիտական անձնագիր ունեցող 25 մարդ օդանավակայանում սպասեցվել է: Մանրամասն ստուգումներ անցկացնելու հետո միայն նրանց թույլ են տվել նստել ինքնաթիռ: Միջադեպերը գրանցվել են Անկարայի, Ստամբուլի և Իզմիրի օդանավակայաններում:

Նրանցից մեկն անգամ այդ ստուգումների պատճառով բաց է թողել իր թռիչքը:

Քյոլնում անհայտ անձինք գողացել էին Թուրքիայի Ազգային մեծ ժողովի փոխնախագահ Այշե Նուր Բահչեքափըլըի պայուսակը, որի մեջ են եղել անձնագիրն ու անձը հաստատող այլ փաստաթղթեր: Պատգամավորը ոստիկանությանը բողոք էր ներկայացրել, Թուրքիայի հյուպատոսարանից ժամանակավոր անձնագիր էր վերցրել, սակայն օդանավակայանում իրավապահ մարմինները նրան միառժամանակ պահել էին և որոշ հստակեցումներ անելուց հետո միայն թույլատրել վերադառնալ Թուրքիա:

Բահչեքափըլըն հայտարարել էր, որ օդանավակայանում վատ վերաբերմունքի է արժանացել, ձերբակալվել է և պահվել հանցագործների հետ: «Շատ նվաստացուցիչ էր իմ երկրի համար: Մենք գերմանացի կամ այլ օտարերկրյա խորհրդարանականի նկատմամբ հարգանք ենք դրսևորում: Շատ վատ պահ անցկացրի»,- ասել է Բահչեքափըլըն:

Գերմանիայի ոստիկանությունը հերքել է թուրք պատգամավորին ձերբակալելու փաստ: Գերմանական կողմը հայտնել է, որ օդանավակայանում միանգամից չեն թույլատրել թռիչքը, քանի որ Բահչեքափըլըի ունեցած ժամանակավոր անձնագրում չի եղել տեղեկություն վիզայի վերաբերյալ:

Փաստի առնչությամբ Թուրքիայում Գերմանիայի դեսպանը կանչվել էր ԱԳՆ: