Բնապահպանության նախարարը երկրի զարգացման գործընթացներում կարևորել է ջրային ռեսուրսների արդյունավետ օգտագործումը

 Բնապահպանության նախարար Արծվիկ Մինասյանը մասնակցել է  «Արարատյան դաշտի  հորատանցքերի, բնական աղբյուրների և ձկնային տնտեսությունների գույքագրման և հաշվառման արդյունքների ներկայացում» խորագրով աշխատաժողովին, որի ժամանակ ներկայացվել են ՄԱԿ-ի ՄԶԳ-ի կողմից ֆինանսավորվող  «Գիտական առաջադեմ տեխնոլոգիաների օգտագործում և համագործակցություն հանուն ռեսուրսների համալիր պահ պանության/ԳԱՏՕ/» ծրագրի շրջանակներում ՀՀ բնապահպանության նախարարության «Հիդրոերկրաբանական մոնիթորինգի կենտրոն» ՊՈԱԿ-ի կողմից  իրականացված  գույքագրման և հաշվառման արդյունքները: Այս մասին «Արմենպրես»-ին տեղեկացրին ՀՀ բնապահպանության նախարարության տեղեկատվության և հասարակայնության հետ կապերի բաժնից:

ՀՀ բնապահպանության նախարարը իր ողջույնի խոսքում նշել է, որ իրականացված աշխատանքներն արդիական են, քանի որ երկրի բնական հարստություն համարվող ջրային ռեսուրսի ապագան և նրա հետագա օգտագործումն ու կառավարումը բերելու է պետության տնտեսական զարգացման հիմնական մոդելների վերանայմանը: Ըստ նախարարի, կատարվել է մեծածավալ և արդյունավետ աշխատանք, ինչի արդյունքում  ձեռք են բերվել բարձր ճշգրտությամբ արդյունքներ և դրանք շատ կարևոր են ջրային ռեսուրսների ոլորտում իրականացվող բարեփոխումների երկրորդ փուլի համար: «ՀՀ կառավարության որդեգրած քա ղաքականության հիմքում  արժևորվում  են էկոհամակարգային մոտեցումները, այս տեսանկյունից անհրաժեշտություն կա ոլորտում վերանայել վարվող քաղաքականությունը, հետևողականորեն  իրականացնել այնպիսի սահմանափակումներ, որոնք ջրի օգտագործումը կբերեն լիարժեք կանոնակարգման դաշտ` այն դարձնելով առավել կարգավորված, թիրախավորված` ի նպաստ էկոհամակարգի պահպանման և զարգացման: Մեր զարգացման հիմնական մոդելում, որպես կարևորագույն տար, պետք է դրվի լիարժեք կարգավորվող ջրային համակարգը»,- իր խոսքում նշել է  Արծվիկ Մինասյանը:

Բնապահպանության նախարարը կարևորել է նաև ջրի օգտագործման ավտոմատ համակարգերի ներդնումը և վերջին ուսումնասիրությունների արդյունքում գույքագրված չշահագործվող հորերի խնդրի արագ լուծումը:  Արծվիկ Մինասյանը բարձր է գնահատել համագործակցությունը դոնոր կազմակերպությունների, մասնավորապես ՄԱԿ-ի ՄԶԳ-ի հետ: Տեղեկացնելով, որ ՀՀ կառավարության ղեկավարը հատուկ հանձնարարական  է տվել ջրային կառավարման ոլորտում բացահայտել բոլոր առանց ջրօգտագործման թույլտվությունների ջրօգտագործողների տվյալները, առաջարկել այնպիսի լուծումներ, որոնք  հիմ նավորապես կբացառեն ապօրինի ջրօգտագործումը` Նախարար Արծվիկ Մինասյանը վստահություն  է հայտնել, որ վարչապետ Կարեն Կարապետյանի դրած խնդրի լուծման շրջանակներում նույնպես համատեղ աշխատանքները կշարունակվեն, և միջազգային կառույցներին ու հասարակական կազմակերպություններին հրավիրել է ավելի լայն համագործակցության:

ԱՄՆ ՄԶԳ հայաստանյան առաքելության ղեկավար Դեբորա Գրիզերն իր խոսքում  նկատել է, որ իրականացվող ծրագրով աջակցություն է ցուցաբերվում ՀՀ կառավարությանը ջրային ռեսուրսների արդյունավետ կառավարման գործում` մասնավորապես նպաստելով Արարատյան դաշտում ստորերկրյա ջրային ռեսուրսների պահպանությանը:

 Աշխատաժողովում ամփոփվել են  իրականացված աշխատանքների արդյունքները: Ուսումնասիրությունների շնորհիվ գույքագրվել է 2807 հոր, 14 բնական աղբյուր 235 ձկնային տնտեսություն: Բացահայտվել են նաև չշահագործվող հորեր, որոնց մի մասից ջրի հոսք է դիտվել և քննարկման ժամանակ առաջարկություն է հնչել դրանք արագ  լուծարել, կոնսերվացնել, կամ, եթե անհրաժեշտություն կա` դրանց մի մասը նպատակային շահագործել: