Պետգույքն օտարելու միտում չկա. Արման Սահակյանը Դվին հյուրանոցի, ԱԳՆ նախկին շենքի և Երիտասարդական պալատի օտարման մասին

Պետական գույքի կառավարման վարչության պետ Արման Սահակյանը համաձայն չէ այն գնահատականների հետ, թե պետական գույքն օտարելու միտում կա։  

«Բազմիցս հայտարարել ենք և հայտարարում ենք, որ ոչ թե զբաղվում ենք պետական գույքի օտարման գործընթացներով, այլ պետական գույքի արդյունավետ կառավարմամբ»,- Tert.am-ի հետ զրույցում ասաց նա:

Հանրապետության հրապարակի՝ Արտգործնախարարության նախկին շենքի վաճառքը Արման Սահակյանն, օրինակ, համարում է իրենց լավագույն ծրագրերից մեկը: 

«Մենք ընդամենը օտարեցինք 14 000-ից մի փոքր քիչ տարածք և ձեռք բերեցինք 30 000 քառակուսի մետր նոր շենք, որտեղ տեղակայված են 5 գերատեսչություններ»,- ասաց նա:

Հարցին, թե ի վերջո ինչ է լինելու նախկին ԱԳ շենքի փոխարեն, Արման Սահակյանը նշեց, որ հստակ պայմանագրում ֆիքսել են: 

«Իհարկե, կողմի մոտեցումները եթե չփոխվեն, պետք է կառուցվի միջազգային չափորոշիչներին համապատասխան հինգ աստղանի բրենդ ունեցող հյուրանոց»,- ասաց նա:

Հարցին, թե ինչ ճակատագիր է սպասվում տարիներ առաջ օտարված և քանդված Երիտասարդական պալատին, Արման Սահակյանը պատասխանեց. «Մեր կառույցի միջոցով չի օտարվել, դա սնանկացման գործընթաց է եղել, և սնանկացման արդյունքով էլ օտարում է տեղի ունեցել»:

Պետական գույքի կառավարման վարչության պետը նաև տեղեկացրեց, որ Դվին հյուրանոցի վերականգնման համար նախատեսվում է նոր ծրագիր՝ 100 մլն դոլար ներդրմամբ։

«Դվին հյուրանոցի համար մենք նոր պայմանագիր կնքեցինք ներդրողների հետ. այս պահին այն ներդրումները, որ նախատեսված են՝ 13 միլիոն դոլարի չափով, ներդրողներն այդ  պայմանագրային պարտավորությունները կատարել են: Սակայն նախատեսվածը չէր բավականացնում, որ ամբողջությամբ ծրագիրն իրականացվեր: Հիմա Կառավարությունը  քննարկում է նոր ծրագիր, ընդհանուր առմամբ՝ մոտ 100 մլն դոլարի ներդրումների մասին է խոսքը»,- ասաց Սահակյանը և նշեց, որ այս պահին 100 մլն-ի ծրագիրը քննարկման փուլում է. եթե հաստատվի, նորից ակտիվ շինարարական աշխատանքներ կսկսվեն:

«Եթե դուք անցել եք Դվինի կողքով՝ կտեսնեք, որ աշխատանքներ կատարվում են, այսինքն՝ մենք բոլոր կիսատ թողնված գործերը հասցնելու ենք իրենց ավարտին»,- ասաց նա:

Արման Սահակյանը նշեց, որ ծրագրում հստակ կետեր կան, թե ինչ պետք է կառուցվի: 

«Ընդհուպ մինչև խաղատան մասին է խոսքը։ Եթե Կառավարությունը հավանություն տա ծրագրին, ապա ներդրումները կիրականացվեն կարճ ժամանակահատվածում»,- ասաց նա:

Պետական գույքի կառավարման վարչության պետի խոսքով՝ ներդրողներն այս անգամ արդեն ունեն  պայմանագրային պարտավորություններ: 

«Ես կոնկրետ ասել եմ, որ 2011-2012 թթ-ին  կքնված պայմանագիրն իրավական առումով թույլ էր, մենք կողմի հետ համաձայնության եկանք, 2012-13 թթ-ին նոր պայմանագիր ստորագրվեց ներդրողների հետ, որոնք ստանձնեցին պարտավորությունը մինչև 2016թ-ն  ավարտել: Բայց ներդրողները նոր, բավական մասշտաբային ծրագիր ներկայացրեցին, և այդ 13 մլն դոլարի ներդրմամբ հնարավոր չէր իրականացնել ամբողջ Դվին հյուրանոցի վերականգնումը։ Հիմա այդ 13-ն ավարտել են, նոր ծրագիր է նախատեսվում 100 մլն-ի»,- ասաց նա: