Ազգությամբ հայ պատգամավոր Արթուր Օգանովը Ռուսաստանի խոշոր բանկերից մեկին 40 մլն դոլար է պարտք. «Փաստ»

«Փաստ» օրաթերթը գրում է.

Հաճախ մոսկովյան պատգամավորները զարմանք են արտահայտում առ այն, որ ժողովուրդը պարզապես չի վստահում իրենց, սակայն, ինչպես ասում են, ամեն հետևանք ունի իր պատճառը: Ռուսներին կարծես թե այլևս հնարավոր չէ զարմացնել պատգամավորների կյանքի հետաքրքիր պատմություններով, ժամանակի ընթացքում կառուցած վիլլաներով, որոնցում բնակվում են նրանց հարուստ կանայք ու, իհարկե, ֆինանսական աճպարարության շնորհիվ անհետացող գումարներով,– գրում է «Կոմսոմոլսկայա պրավդա» թերթը:

Ամեն ինչ սկսվել է նրանից, երբ լրագրողը Ռուսաստանի դատական կարգադրիչների դաշնային ծառայություն պաշտոնական կայքում խոշոր պարտատերերի ցուցակում հայտնաբերել է «Եդինայա Ռոսիա» խմբակցության պատգամավոր Արթուր Օգանովի անունը, ով ունի չվճարված 2,7 մլրդ ռուբլի:

Թերթը հիշեցնում է, որ պատգամավորը հանդիսանում է «Ակվարել» ՍՊԸ–ի տնօրեն, որի հիմնադիր են հանդիսանում նրա կինն ու որդին: Ընկերությունը զբաղվում է անշարժ գույքի բիզնեսով, որը, ինչպես նշվում է հոդվածում, բավական շահավետ աշխատանք է՝ հաշվի առնելով վարձակալողների բիզնես ոլորտում խոշոր ու վճարունակ լինելու փաստը: Նշենք, որ վարձակալողներից են՝ «Շոկոլադնիցա» սրճարանների ցանցը, «Բուրգեր Կինգ» արագ սննդի ռեստորանային ցանցը, «ԱԿԲարս» բանկը եւ այլ ընկերություններ:

Պարզվում է՝ պատգամավորը, 2012 թվականին վարկ է վերցնում խոշոր բանկերից մեկից՝ «Ալֆա» բանկից` մեկ այլ բանկի հանդեպ ունեցած վարկային պարտավորությունները կատարելու նպատակով: 2013 թվականին Օգանովը դիմում է «Ալֆա» բանկ` խնդրելով իր վարկային գիծը հասցնել մինչև 40 մլն ԱՄՆ դոլարի, սակայն մերժում է ստանում եկամուտների ոչ բավարար լինելու պատճառով: Վարձավճարների ավելացմամբ եւ այլ համապատասխան թղթերի ու լեգալ եկամուտների շնորհիվ Օգանովը հասնում է նրան, որ բանկը տրամադրում է իր կողմից նշված գումարը:

Վարկի մարման գործընթացում Օգանովը ձգձգում է ճիշտ ժամանակին կատարվելիք վճարները, պատճառը հանդիսանում է խոշոր գործընկերներից մեկի հրաժարումը վարձակալած տարածքներից: Վարձավճարի մեծ լինելու պատճառով ընկերությունը Օգանովից պահանջել է իջեցնել վարձավճարի գումարի չափը, սակայն մերժում է ստացել, որի հետևանքով տվյալ ընկերությունը հրաժարվել է համագործակցությունից: Այդ օրինակին հետևել են նաեւ մյուս վարձակալները:

Ստեղծված վիճակի շուրջ բանկը քննություն է անցկացրել` հասկանալու, թե որտեղ ու ինչի վրա են ծախսվել ընկերության գումարները: Ինչպես պարզ է դարձել` Օգանովի ընկերության գումարները ծախսվել են իր տիկնոջ շքեղ ու գեղեցիկ կյանքի, թանկարժեք մեքենայի ու գերշքեղ վիլլայի կառուցման վրա:

Օգանովը, ով հանդիսանում է Ֆիլյովսկի պարկ մունիցիպալիտետի պատգամավոր, ով իր իրական գործունեությունը քողարկում է սոցիալապես անապահովներին ու պատերազմի վետերաններին աջակցելով, ներկայում ահռելի պատքեր ունի «Ալֆա» բանկին, որի չափը հասնում է մոտ 2,7 մլրդ ռուբլու, ինչն իր հերթին մի քանի անգամ գերազանցում է նշված համայնքի տարեկան բյուջեն:

Ինչպես նշում է թերթը, մինչ վարկատուն փորձում է օրենքով վերադարձնել սեփական գումարները՝ դիմելով դատարան, պատգամավորը վայելում է բանկին չվճարված գումարները` միևնույն ժամանակ պաշտպանվելով ունեցած մանդատով:

Հ.Գ. Այսպիսով, ծանոթանում ենք հերթական պատմությանը, որտեղ ազգությամբ հայ գործարարն արտերկրում անբարեխղճորեն վարելով իր բիզնեսները` սևացնում է հայի ու հայ գործարարի համբավը:

Շարունակությունը` «Փաստ» օրաթերթի այսօրվա համարում: