Մայրաքաղաքային աղցան, նրբաբլիթներ... Հոգնե՞լ եք այս միանմանությունից. այս հոդվածը ձեզ համար է

Այս հեշտ և օրիգինալ բաղադրատոմսերը ձեզ կօգնեն Ամանորին զարմացնել ձեր հյուրերին:

Մեքսիկական սալսա

Բաղադրություն (8 հոգու համար)

• 4 լոլիկ
• 2 մեծ վարունգ
• 2 մեծ բուլղարական պղպեղ
• 1 կարմիր սոխի գլուխ
• 1 մեծ կամ 2 փոքր ավոկադո
• 2 գլուխ սխտոր
• 1/3 բաժակ լիմոնի հյութ (ճզմած)
• 1 կապոց համեմ
• 1/4 թեյի գդալ կծու բիբար (աղացած)
• 1-2 տուփ եգիպտացորեն
• աղ/պղպեղ՝ ըստ ճաշակի

Բոլոր բաղադրիչները կտրատեք քառակուսիներով: Խառնեք՝ ավելացնելով լիմոնի հյութը:

Իտալական աղցան մակարոններով

Բաղադրություն (8 հոգու համար)

• 600գ խոզապուխտ
• 4 լոլիկ
• 4 քաղցր բուլղարական պղպեղ
• 700գ մակարոն
• 3 բաժակ կոնսերվացված եգիպտացորեն
• 2 բաժակ քերած պանիր
• մայոնեզ կամ այլ սոուս

Եփեք մակարոնները և թողեք, որ սառչի: Կտրատեք լոլիկներն ու պղպեղները քառակուսիներով, իսկ խոզապուխտը՝ բարակ շերտերով: Պանիրը քերեք մեծ անցքերով քերիչով: Խառնեք բոլոր բաղադրիչները՝ ավելացնելով սոուսը:

Սաղմոնով և լավաշով խորտիկներ

Բաղադրություն (ստացվում է մոտ 50 կտոր)

Միջուկի համար

• 250գ կարագ
• 1/2 բաժակ թթվասեր
• 1/2 թեյի գդալ սխտորի փոշի
• 1 մեծ լիմոնի ցեդրա
• 1/2 թեյի գդալ աղ
• 1/4 բաժակ սամիթ

Մյուս բաղադրիչները

• 3 բարակ լավաշ
• 350գ ապխտած սաղմոն
• մի քիչ կարագ

Նախ խառնեք միջուկի բաղադրիչները: Խառնուրդի կեսը քսեք լավաշներից մեկի վրա, հաշվի առեք, որ լավաշի ծայրերը կտրվելու են: Վերևից դրեք սաղմոնի կեսը: Մյուս լավաշի վրա քսեք մի փոքր կարագ և այդ կողմով դրեք սաղմոնի վրա, այդպիսով սաղմոնը կամրանա լավաշին: Այնուհետև լավաշին քսեք միջուկի մնացած մասը, վրան դրեք սաղմոնը և 3-րդ լավաշի շերտը վրան կարագ քսած, այդ կողմով դեպի սաղմոնը: Փաթաթեք սննդային թաղանթով (пищевая пленка) և 4 ժամով դրեք սառնարան (կարելի է թողնել ողջ գիշեր): Հանելուց հետո կտրեք լավաշի ավելորդ հատվածները՝ հաղորդելով քառակուսու (ուղղանկյունու) տեսք: Այնուհետև ամբողջից առանձնացրեք քառակուսիներ և դրանցից յուրաքանչյուրը ծակեք ատամի փայտիկով: