Ռուսական եւ հայկական շոու-բիզնեսի «դիմակազերծումը»

Զառա Մխեյանը, ում հիմնած ընկերությունը 25 տարի շարունակ Ռուսաստանում եւ Հայաստանում համերգներ եւ միջոցառումներ է կազմակերպում, պատրաստվում է «դիմակազերծել» շոու-բիզնեսի աստղերին։ «Ուրվականների շոուն» կոչվող իր գրքում Մխեյանը քողազերծում է ժամանակակից վերնախավի իրական կյանքի գաղտնիքներն ու ծածուկ կողմերը:

NEWS.am STYLE-ի հետ զրույցում Զառա Մխեյանն ասաց, որ գիրքը պատմում է հայկական ծագմամբ ռուսաստանաբնակ մի երիտասարդ միլիարդատերի մասին, ով շուտով նշելու է իր կողմից Հայաստանում հիմնված ընկերության տարեդարձը, որին հրավիրված են հիմնականում ռուսական եւ հայկական առաջին մեծության աստղեր:

«Սովորաբար ես հետեւում եմ շուրջս կատարվող բոլոր իրադարձություններին, սակայն դեռեւս բիզնեսի ոչ մի այլ ոլորտում նման մրցակցության չեն հանդիպել, ինչպիսին շոու-բիզենսում է: Յուրաքանչյուր երկրորդ աղջնակ իրեն իրավունք է վերապահում մասնակցել այդ մրցակցությանը՝ բոլորի սիրելին, հարուստ, հանրաճանաչ ու ցանկալի երգիչ դառնալու նպատակով:

Որոշելով պատասխանել՝ ինչպես դառնալ աստղ մշտական հարցին, ես հարցազրույցներ եմ ունեցել ամենահարուստ եւ հանրահայտ ռուսական եւ հայկական աստղերի, շոու-բիզնեսի հսկաների, պրոդյուսերների, երգահանների, սաունդպրոդյուսերների, ռադիոյի, առաջատար ձայնագրման կենտրոնների ներկայացուցիչների, հովանավորների, ներդրողների հետ: Բոլոր նրանց, ովքեր «վառում են» շոու-բիզների աստղերը: Իսկ ամենակարեւորը՝ ես ապրում եւ աշխատում եմ նրանց միջավայրում արդեն 25 տարի, եւ այն ամենը, ինչ պատմված է այս գրքում, հիմնված է իրական իրադարձությունների վրա: Իսկ գրքի բոլոր հերոսները կամ իրական կերպարի նախատիպ են կամ հավաքական կերպար»,-ասաց Զառան։

«Ուրվականների շոուն» գիրքը լույս կտեսնի Մոսկվայում՝ 2016 թվականի հունվարին։ Երեւանում այն կլինի ապրիլ ամսից։