Նոր վարկ, նոր արտաքին պարտք ու նոր իրարանցում

ՀԱՐՑԱԶՐՈՒՅՑ 23 Դեկտեմբեր, 2016 22:41

ՀՀ կառավարության կողմից հրավիրած ԱԺ արտահերթ նիստում երեկ քննարկվում էր «Կառավարության զարգացման ֆրանսիական գործակալության» միջև ստորագրված միջազգային համաձայնագիրը, որի շուրջ Past.am-ը զրուցեց ՀԱԿ խմբակցության քարտուղար Արամ Մանուկյանի հետ:

«Այսօր բանկերում կա երկու տրիլիոն դրամ ավանդ, չորս միլիարդ` գումար: Սա նշանակում է, որ հայաստանցի հարուստները փողը չեն դնում բիզնեսի մեջ, քանի որ վախենում են: Եթե այդ չորս միլիարդ դոլարի տասը–քսան տոկոսը գար բիզնես, առևտուր, մեր տնտեսությունը թափ կառներ»,– ասաց նա՝ հավելելով, որ ՀՀ–ում ծնված ցանկացած քաղաքացի այս պարտքը իր վզին է ծնվում:

«Յուրաքանչյուր քաղաքացու վրա այդ պարտքը կազմում է երեք հարյուր դոլար: ՀՀ–ն, ըստ «Կարնեգի» հիմնադրամի տվյալների, աշխարհում գրավում է երրորդ տեղը՝ արտագաղթի ծավալով: Առաջին տեղում Սիրիան է, Բոսնիա–Հերցոգովինան: Այսինքն՝ ՀՀ–ում ամեն չորսից մեկը պաշտոնապես արտագաղթել է: Եթե մարդը, արտադրողը ՀՀ–ից դուրս է, դուք ո՞նց եք բյուջե հավաքելու ու տնտեսական աճ ցույց տալու, պարտքը փակելու: Բյուջեն ու ֆինանսները քաղաքականություն են, ու այդ իմաստով դուք ձախողած եք, դուք որևէ լուծում չունեք»,– ասաց նա:

Պատգամավոր, «Ազատ դեմոկրատներ» կուսակցության նախագահ Խաչատուր Քոքոբելյանն էլ ցավով հայտնեց, որ մինչ օրս ՀՀ–ն շարունակում է վարկահավաքության գործընթացը:

«ՀՀ–ն կարծես մի պետական մեքենայի է վերածվել, որը, կարծես, վարկահավաքությամբ է զբաղվում: Ես երբևիցե չեմ խուսափել ասել, որ վարկը կարող է դրական գործընթաց լինել, և դա այդպես է, եթե այդ վարկը հավելյալ արժեք է ստեղծում կամ բերում է տնտեսության նոր հնարավորություններ ստեղծելուն, բիզնեսի ու տնտեսության բարելավմանը և այլ խնդիրներ լուծելուն»,– ասաց նա՝ նկատելով, որ նոր վարկեր վերցնելու գործընթացն ավելի շատ միտված է բյուջեի այս կամ այն բացը փակելու, վարկ կուտակելու, արտաքին պարտքը մեծացնելու համար: Կարծես կարկատան են անում:

«Նրանք պետք է համոզիչ փաստեր ներկայացնեն, թե այդ վարկով ինչ խնդիրներ են լուծելու, մինչ այս պահը մենք այդ փաստերը չունենք: Մասնավորաբար այս իրավիճակում մենք, բնականաբար, դեմ ենք այդ վարկին»,– շեշտեց Խ. Քոքոբելյանը:

Ի հեճուկս պատգամավորներից շատերի կարծիքների, ՀՀԿ խմբակցության պատգամավոր Սուքիաս Ավետիսյանը որևէ վտանգ չի տեսնում նոր պարտքեր հավաքելու գործընթացում:

«Երեք վարկային ծրագրերն էլ բյուջետային ծրագրեր են: Այդ գումարներն արդեն ծառայել են նպատակին, որովհետև վարկային միջոցների մի մասը նախատեսված է եղել 2016 թվականի բյուջետային ծախսերում, քանի որ ծախսերն արդեն իսկ իրականացվել են՝ ուրեմն նպատակ են ունեցել: Քանի որ այդ գումարները ներգրավել են որոշակի ռեզերվային գումարներից, ապա այս վարկերը վավերացնում են, որ ներգրավեն ու համալրվեն ռեզերվային գումարները: Նպատակը մեկն է այն միտված է պետության ֆինանսական կայունության ապահովմանը»,– ասաց նա:

Սոսե Չանդոյան