Կործանված «Տու-154»-ում է եղել հայտնի քաղակտիվիստ Բժիշկ Լիզան, ով դեղորայք էր տանում Սիրիա

Ռուսաստանում հայտնի քաղաքացիական ակտիվիստ, «Արդար օգնություն» հիմնադրամի ղեկավար, բարեգործ Էլիզավետա Գլինկան, ով ավելի շատ ճանաչված էր որպես Բժիշկ Լիզա, գտնվել է այսօր առավոտյան Սև ծովում կործանված «Տու-154» օդանավում:

Ինչպես հայտնում է interfax.ru-ն, ՌԴ նախագահին կից Մարդու իրավունքների հարցերով խորհրդի ղեկավար Միխայիլ Ֆեդոտովը ցավակցել է Գլինկայի ընտանիքին՝ նշելով, որ նա հրաշալի անձնավորություն էր:

Պաշտոնյան մանրամասնել է, որ Գլինկան Սիրիա էր մեկնում Լաթաքիայի համալսարանական հոսպիտալին անհրաժշետ դեղորայք հասցնելու առաքելությամբ:

«Ուրիշների կյանքը փրկելը Գլինկայի առաքելությունն էր, որը նա իրականացնում էր ամենուր՝ Ռուսաստանում, Դոնաբասում, Սիրայում...»,-հավելել է Ֆեդոտովը:

Քաղակտիվիստի և բարեգործի մահվան կապակցությամբ Twitter-ում տարածվել է մի տեսանյութ, որում կինը, ելույթ ունենալով ՌԴ նախագահ Վլադիմիր Պուտինի և այլ պաշտոնյաների առաջ, ասում է, որ ռազմական գործողությունների մեկնելուց առաջ իրենք երբեք վստահ չեն` արդոք ողջ-առողջ հե՞տ են վերադառնալու:

Ինչպես ավելի վաղ հայտնել էր Tert.am-ը, ՌԴ պաշտպանության նախարարությունը պատկանող «Տու-154» օդանավը, որում եղել է 91 մարդ, կործանվել է Սև ծովի տարածքում: Դեպքի վայրում հայտնաբերվել է 7 դի, ինչպես նաև օդանավի բեկորները:

 Ռուսական НТВ հեռուստաալիքը հրապարակել է ինքնաթիռում գտնվող ուղևորների անունները, նրանց թվում կա նաև հայկական ազգանունով ուղևորներ. Գեորգիյան Հովհաննես Պետրոսի և Վահանով. Ա. Ի.: Նշենք, որ Վահանովը եղել է ուղեկցող անձնակազմի անդամ, իսկ Գեորգիյանը՝ Ալեքսանդրովի անվան երաժշտական անսամբլի անդամ:

Նշվում է, որ ուղևորների թվում են եղել լրագրողներ, երաժշտական անսամբլի անդամներ, որոնք ուղևորվելիս են եղել Սիրիայում գտնվող Հմեյմիմ ավիաբազայի տարածքում գտնվող ռուս զինվորների Ամանորը շնորհավորելու նպատակով կազմակերպված միջացառմանը մասնակցելու։

 Պն օդանավի կործանման դեպքի առնչությամբ Ռուսաստանի Քնչական կոմիտեն քրեական գործ է հարուցել: