Սոթքում ինքնասպանության փորձ կատարած 25-ամյա կնոջ ամուսինը մշտական աշխատանք է փնտրում

Դեկտեմբերի 21-ին Սոթքում ինքնասպանության փորձ կատարած 25-ամյա Արծվիկ Գևորգյանի ընտանիքին օգնություն տրամադրելու առաջարկներ են արվել։ Այս մասին Теrt.am-ի հետ զրուցում տեղեկացրեց 25-ամյա Արծվիկի սկեսուրը՝ տիկին Լենան։

«Դե գյուղապետի տղան եկավ ասեց, որ գյուղապետը կանչում է, անձնագիրս վերցնեմ գնամ սնունդ ստանամ, ոնց որ գումար էլ, պատգամավոր Նաիրա Զոհրաբյանն էլ զանգել հաշվեհամար է հարցրել: Չգիտեմ ինչ ենք անելու, ինչպես ուշքի գալու, հա՛մ հարսիս պիտի խնամեմ, հա՛մ ամուսնուս, ինքն էլ է հիվանդանոցում,  համ էլ թոքաբորբով հիվանդ թոռանս»,- մանրամասնեց տիկին Լենան։

Նա սրտնեղեց, որ 1,5 տարեկան տղա թոռանը ևս պարբերաբար հիվանդանոց են տանում, բայց հիվանդությունը կրկնվում է, քանի որ  չէին կարողանում տունը ջեռուցել, երեխային սննդով, ձմեռային հագուստով ապահովել։

«Մտածում եմ էս խնդիրների, դժվարության մեջ վաղն ինչպես արթնանամ: 25 տարեկան հարսը կյանքից էր ուզում զրկվել ՝փողի բացակայության պատճառով, բա երկու թոռներս առանց մայր ի՞նչ էին անելու, լավ է՝ տղես հարևանների հետ օգնության է հասել»,- նշեց նա։

Տիկին Լենայի խոսքով՝  դեռևս 31 ամյա որդուն՝ Արտյոմ Օսուպովին աշխատանքի տեղավորման առաջարկ չեն արել։ «Ինքը գլուխ պահող չի, որ գործ լինում է անում է, կով էլ է կթում, ցախ էլ հավաքում, բայց դե  դրանք մշտական գործ չեն, պատկերացրեք՝ որդուս վիճակը, կինը նման քայլի էր դիմել»,- ասաց նա:

Նա հիշեցրեց, որորդին դեկտեմբերի 21-ին գնացել էր ցախ հավաքելու, տուն վերադառնալով սեղանի վրա գրություն էր տեսել, քանի որ կարդալ չգիտի, գրությունը տարել էր հարևանների տուն։ 25 ամյա կինը գրել էր, որ ամուսնուն չնեղացնեն՝ վատ պայմանների պատճառով որոշել է ինքնասպան լինել։

Բարեբախտաբար, ամուսինը հարևանների հետ միասին ժամանակին գնացել է գոմի ուղղությամբ, պատուհանից տեսել են, որ կինը կախված է, կտրել են պարանը։ 25- ամյա կնոջը հաջողվել է փրկել։