Սբ Ծնունդ կամ խոսք քաղաքին ու աշխարհին

Անցած կիրակի արևմտյան քրիստոնյաներն իրենց ամենակարևոր տոներից մեկը՝ Սբ Ծնունդն էին նշում, ու թեպետ կաթոլիկների հետ միասին Սբ Ծնունդը նշում էր նաև ուղղափառ եկեղեցիների մեծ մասը, ինչպես նաև՝ ավետարանականների ու բողոքականների առանձին հոսանքներ, ողջ աշխարհի ուշադրությունը հիմնականում ուղղված էր կաթոլիկ աշխարհի Սբ Պետրոսի տաճար, որտեղից Ֆրանցիսկոս պապը պիտի իր առաքելական խոսքն ուղղեր Urbi et Orbi` քաղաքին ու աշխարհին:

Տարօրինակ կերպով այս անգամ նույնիսկ բուքմեյքերական գրասենյակներն էին ակտիվացել՝ ազարտում ներգրավվածներին առաջարկելով խաղադրույքներ դնել Պապի կողմից ամենաշատը արտասանվելիք բառերի վրա: Եվ, փաստորեն, չսխալվեցին նրանք, որոնք կենտրոնացան բռնություն, սեր, գթասրտություն, խաղաղություն բառերի ուղղությամբ, որովհետև Պապը, ինչպես միշտ, իր ուղերձում անդրադարձավ աշխարհի ամենաթեժ կետերում շարունակվող բռնություններին՝ Քրիստոսի ծննդյան ավետիսը պարգևած Իսրայելից մինչև Ուկրաինա, Սիրիա, Կոլումբիա և այլուր` կոչ անելով դադարեցնել դրանք: Խաղաղություն, գթասրտություն, սեր՝ Պապն առաջարկեց Ծննդյան տոներին ամբողջ խորությամբ ընկալել այս հասկացությունների իրական բովանդակությունը՝ անկախ կոնֆեսիաներից:

Մտածել այն մասին՝ ով ենք մենք, ով է Քրիստոսը քրիստոնյաների համար, ինչ է Սբ Ծնունդը ամեն մեկի համար, բեթղեհեմյան ցուցիչ աստղը Քրիստոսի ծնունդը մեր սրտերո՞ւմ, թե՞ մեզ հետ կապ չունեցող հեռավոր մսուրում է նորից ավետում: Եվ, արդյոք, ի վիճակի՞ ենք նկատել, որ թշնամանքի, մենության ծնունդ առած Մանկան անտարբեր ժամանակների նմանությամբ՝ ողջ ախշարհն այժմ էլ անտարբեր է թե՛ սեփական սխալների, թե՛ այս պահին էլ տառապող մանուկների նկատմամբ:

Պապը խնդրեց կոմերցիայի, կեղծ ուրախության, անհոգության, տառապանքի վերածված մեր կյանքի ընթացքն ուղղել դեպի իրական Ծնունդ և անգամ մեր թուլություններն արհամարհելով՝ դառնալ բեթղեհեմյան աստղով առաջնորդվող իմաստուն հովիվներ: Բաց սրտով մոտենալ Մանկանը և պարզապես շնորհակալություն ասել ամենի համար, ինչ նա արել է մեզ համար: Misereatur nostri omnipotens Deus՝ Եվ թող ողորմի մեզ ամենակարող Աստված՝ եզրափակեց Պապը: