Life.panorama.am-ը գրում է.
Թե ինչպե՞ս զարդարել տոնածառը, ո՞ր գույներին նախապատվություն տալ ու աքլորի տարին ինչ տեսքով դիմավորել. Այս հարցերի շուրջ Life.panorama.am-ը զրուցել է իր գունեղ ոճով հայտնի Սոֆյա Դիլանյանի հետ:
«Այս տարի Ամանորին ընդառաջ իրականացրինք միմյանցից շատ տարբերվող, բայցեւ շատ հետաքրքիր զարդարանքներ, ամանորյա դեկորացիաներ: Մի քանիսն ավանդական ոճում էին, որը շարունակում է ոչ պակաս գեղեցիկ ու ակտուալ մնալ: Ավանդական կարմիր ու կանաչ գույները` հետաքրքիր լուծումներով հագեցած, տոնական զարդարանքներին շքեղ տեսք կարող են հաղորդել: Իսկ մյուս տարբերակում իրականացրինք մի շատ հետաքրքիր ձեւավորում, որի գլխավորը երանգները սեւ ու սպիտակ վանդակներն էին»,- տոնական զարդարանքների մասին խոսելիս` պատմեց Սոֆյան ու շարունակեց.
«Եթե մի կողմ թողնենք նորարարությունները ու խոսենք ամանորյա մշտական ակտուալ գույներից, ապա պետք է հիշել, որ կարմիրը, կանաչը, ոսկեգույնն ու արծաթագույնը միշտ են գեղեցիկ ամանորյա զարդարանքներում»:
Ամանորյա հին իրերից, Սոֆյայի խոսքով, հրաժարվել պետք չէ.
«Եթե կան սիրելի տոնական ատրիբուտներ, որոնք նաեւ իրենց մեջ պատմություն են կրում, պետք չէ դրանք դեն նետել: Կարելի է այդ ամենը պահել մի գեղեցիկ տուփի մեջ` ակնկալելով, որ տարիներ անց դրանք կրկին նորաձեւ կդառնան»,- հավելեց նա:
Հետաքրքրվելով, թե գույների սիրահար Սոֆյա Դիլանյանը աքլորի տարվա համար ի՞նչ երանգներ է առաջարկում առավելագույնս գեղեցիկ ու յուրօրինակ տեսք ունենալու համար, պատասխանեց.
«Գիտեք, ես այն մարդկանցից եմ, ում երբեք հետաքրքիր չէ այն, ինչ թելադրում է շուկան կամ ամբոխը: Ես միշտ սիրել եմ վառ գույներ: Նույն կերպ վերջերս` չմտածելով ոչնչի մասին, ես ուղղակի ներքին ձայնիս լսելով, մազերս ներկեցի աքլորի պոչի երանգներով` կանաչ ու կապույտ: Սակայն, եթե խոսենք տարվա տենդենցների մասին, ապա պետք է նշեմ, որ նորաձեւ են մետալիկ երանգները, մուգ կանաչը, ալ կարմիրը, նաեւ հետաքրքիր է կապույտ-մոխրագույն համադրությունը: Ընդհանուր առմամբ` այն բոլոր գույները, որոնք կարելի է նկատել աքաղաղի փետուրներին նայելիս, այս տարի նորաձեւ կլինեն»:
Մեր զրուցակիցը ընդգծեց` երբեք թելադրանքների զոհ չի դառնում, ապա զգեստապահարանը թարմացնելու վերաբերյալ խորհուրդ տվեց.
«Ես չեմ սիրում թելադրանքն ու կարգադրանքը: Կարծում եմ` ուղղակի կարելի է հին իրերը պահել ճամպրուկի մեջ, այս շարքում հատկապես կիպ զգեստները, ցածր գոտկատեղով ջինսե տաբատները, պլատֆորմայով կոշիկները, որոնք մերկապարուհու կոշիկներ են հիշեցնում, այս բոլորը հարկավոր է ուղղակի հանել զգեստապահարանից: Ընդհանուր առմամբ հաշվի առնել, որ այս տարվա գլխավոր տենդենցներից են աքլորի ճչացող գույները ու հիշել, որ այս տարին նրանց համար է, ովքեր չեն վախենում խիզախ համադրություններից»:
