Հանգիստ տոնեք Ամանորը, մենք կլռեցնենք հակառակորդին. զինվորները՝ հասարակությանը (տեսանյութ)

Խիստ կանոնակարգված և հաշվարկված օրակարգում զինվորները ժամանակ են հատկացրել նաև ամանորյա զարդարանքին, մրցույթ է հայտարարված` ընտրվելու է լավագույն զարդարված զորանոցը. Tert.am-ին Տավուշում տեղակայված զորամասերից մեկի զինվորները ներկայացրին իրենց կատարած աշխատանքները։ 

«Փոքր անակնկալ ունենք պատրաստած նաև զորացրվողների համար. տոնածառի վրա կպցնում ենք թղթեր, որոնց վրա գրված են զորացրվողների անունները։ Մեր ձեռքով բամբակից եղնիկ ենք պատրաստել, աքլոր, ննջասենյակները ևս զարդարված են, ամենաշատը չարչարվել ենք տոնածառի վրա»,-պատմեց սերժանտ Գևորգ Բեջանյանը։

Զինվորներին տոնական օրերին տրվելու են նաև հատուկ ուտեստներ։ Tert.am-ի հետ զրույցում տվյալ զորամասի թիկունքի պետ, փոխգնդապետ Արթուր Ասատրյանը նշեց, որ Պաշպանության նախարարությունը ամեն ինչ հատկացրել է՝ սննդից մինչև քաղցրավենիք, միրգ։

«Նախապես հաստատված հայտով ստացել ենք խոզի միս տոնական օրերին խորոված պատրաստելու համար, զինվորներն իրենց ձեռքերով կանեն խորովածը, ունենալու ենք տավարի խաշլմա, տոլմա, բլինչիկ, խմորեղեններ ենք պատրաստել, չարազ էլ է լինելու...»,-մանրամասնեց նա։

Զինվորներն իրենց մայրերին, հասարակությանը հորդորեցին հանգիստ տոնել՝ նշելով, որ իրենք հակառակորդին կլռեցնեն, հարկ եղած դեպքում նաև կպատժեն։

«Մենք զգոնությունը չենք կորցնում, ամեն վայրկյան պատրաստ ենք արժանի հակահարված տալու»,-վստահեցրեցին զինվորները՝ հավելելով, որ հակառակորդը համոզվել է, որ այսօր մեր բանակը կարող է խաղաղություն պարտադրել։

Մանրամասները՝տեսանյութում։