Հայտնի է Գրիգոր Դանիելյանի և Հռիփսիմե Ելինյանի երկրորդ երեխայի սեռը

Tert.am Life-ը գրում է.

Դերասան Գրիգոր Դանիելյանի և երգչուհի Հռիփսիմե Ելինյանի համար 2017 թվականը շատ սպասված է: Այս տարի լույս աշխարհ կգա զույգի երկրորդ բալիկը, որը երկար սպասված էր նրանց ընտանիքում:

 

Հռիփսիմեն առաջինը Tert.am Life-ին է հայտնել երկրորդ երեխայի սեռն ու պատմել, թե ինչպես են անցկացրել Ամանորը: «Ինչպես ամեն տարի, այս տարի էլ Նոր տարին տանը չենք դիմավորել: Մեկնել ենք Ծաղկաձոր»,- ասաց նա:

 

 

Անդրադառնալով փոքրիկի ծննդին՝ Հռիփսիմեն նշեց, որ իրենց ընտանիքում այս իրադարձությունը երկար սպասված էր: Զույգը վաղուց էր պլանավորում կրկին երեխա ունենալ:

 

«Ես Բջնիում էի՝ մեր ամառանոցում, երբ իմացա, որ բալիկի եմ սպասում: Գրիգորն աշխատանքի էր: Հաղորդագրություն ուղարկեցի՝ պապա, ե՞րբ ես գալու: Քանի որ մենք պլանավորում էինք փոքրիկ ունենալ, նա միանգամից գլխի ընկավ, որ խոսքը կրկնակի պապայի մասին է:)»,- պատմեց Հռիփսիմեն ու հավելեց, որ փոքրիկի ծնունդը նախանշված է մարտի վերջին:

 

 

Զույգը կրկին որդի է ունենալու: Գրիգորն ու Հռիփսիմեն դեռ չեն որոշել փոքրիկի անունը: «ԱՄՆ-ից վերադառնալուց հետո իմացանք, որ երեխան տղա է: Երեխայի սեռը մեզ համար կարևոր չէր: Չպետք է դեմ գնալ Աստծո կամքին: Կարևորը առողջ բալիկ լինի»,- ասաց երգչուհին:

 

Հռիփսիմեն նկատեց, որ յուրաքանչյուր ընտանիքում երեխայի ծնունդն ամենասպասված երևույթն է։ «Ալբերտոն արդեն 7 տարեկան է: Այսքան դադարից հետո մեզ համար մեր փոքրիկը կրկնակի սպասված էր»,- ասաց նա: Մայրիկը հայտնեց, որ Ալբերտոն անհամբերությամբ է սպասում փոքրիկի ծննդին. «Հաճախ նույնիսկ ասում է՝ չեմ համբերում, ուզում եմ ապերիկը շուտ գա:)»:

 

 

Հռիփսիմեն նախատեսում է փոքրիկի ծննդից հետո էլ աշխատել. «Շարունակելու եմ ղեկավարել «Trio» ստուդիան և դասավանդել Կոնսերվատորիայում, միևնույն ժամանակ, զբաղվելու եմ փոքրիկի խնամքով»:

 

 

Նյութը՝ Ամալյա Հովհաննիսյանի

 

Լուսանկարները՝ Գրիգորի և Հռիփսիմեի անձնական արխիվից