Լուիզա Ներսիսյանին նորություններով լեցուն տարի է սպասվում

 Tert.am Life-ը գրում է.

2016-ը դերասանուհի Լուիզա  Ներսիսյանի համար բուռն աշխատանքային տարի էր: Tert.am Life-ի հետ զրույցում Լուիզան պատմեց իր ձեռքբերումների եւ առաջիկա ծրագրերի մասին:

«2016-ը աշխատանքով լեցուն տարի էր՝ նոր համագործակցություններով, շրջագայություններով եւ նոր ներկայացումներով: Որ ասեմ շատ ձեռքբերումներ եմ ունեցել, այդպես չէ, բայց գոհ եմ: Շրջագայությունների ժամանակ եմ մեծ բավականություն ստացել: Նոր հանդիսատես, նոր շունչ, որը ստիմուլ է տալիս արտիստին աշխատելու ու ստեղծագործելու: Նրանց կարոտը եւ ջերմությունը մեզ էլ է փոխանցվում եւ այդ ժամանակ ենք հասկանում հայրենիքի հանդեպ սերը: Մենք, ապրելով Հայաստանում, չենք նկատում դա: Հետաքրքիր էր նաեւ ռեժիսոր Վահիկ Փիրհամզեի հետ համագործակցությունը: Կարծում եմ մեր համագործակցությունը կշարունակվի այս տարի»,- պատմեց Լուիզան:

Դերասանուհին բազում նպատակներ եւ ծրագրեր ունի այս տարվա հետ կապված: Նրա խոսքով. «Մտքեր կան, որոնք բազմաշերտ են եւ դրանց կեսն էլ իրականացնեմ, ապա շատ լավ տարի կլինի: 2017-ին ցանկանում եմ նախագիծ անել, որով կկիսվեմ մտահոգիչ խոհերով: Ուզում եմ ներքինի եւ արտաքինի ներդաշնակություն: Այն ծածուկ մտքերը, որն ունեն մարդիկ, թող բարձրաձայնեն, անեն այն, ինչ ուզում են: Եթե յուրաքանչյուրն ընդունի, որ բոլոր ձախողումները եւ հաղթանակները իրենից է կախված, ապա շատ լավ կլինի: Պետք է հանգամանքների գերի չդառնալ»:

 

Լուիզայի համար գրեթե բոլոր Նոր տարիները հիշարժան են եղել: «Դրանք իմ կյանքի ակնթարթներն են: Անցյալը միշտ քաղցր է լինում եւ միշտ հաճույքով ես հիշում: Այս տարի բացառություն չէ, ուրախ եւ հիշարժան ձեւով եմ տոնել»,- նշեց նա:

Հարցին, թե ինչ նվեր է ուզել իր դուստրը, Լուիզան պատասխանեց. «Աղջիկս մինչեւ հիմա հավատում է Ձմեռ պապին: Նա նամակ է գրել եւ մեզ ցույց չի տվել, մտածում է, եթե ցույց չտա կկատարվի: Անկեղծ ասած, նա այնքան է հավատում, որ ես էլ եմ սկսել հավատալ՝ Ձմեռ պապ կա եւ աղջկաս ցանկություն էլ անպայման կիրականացնի: Իսկ ես նոր գիտակցմամբ,  նոր սպասելիքներ ունեմ: Թեկուզ փոքր եւ մեծ խոչընդոտներով հաղթահարելով հետաքրքիր է անցնում տարին, քանի որ դու սկսում ես դրանից  նորը սովորել: Փորձում եմ չծուլանալ եւ չանհանգստացնել անհանգստությանը, մինչեւ անհանգստությունը չի անհանգստացրել ինձ»:

Նյութը՝ Մելինե Տոնոյանի