Նախնական տվյալներով` 26-ամյա սպան մահացել է ավտովթարի հետևանքով. ավտոմեքենան գլորվել է ձորը. ՔԿ

2015թ. սեպտեմբերի 20-ին' ժամը 18:00-ին, Սիսիան քաղաքի բնակիչ Վալերիկ Դավթյանից հաղորդում է ստացվել, որ որդին՝ Սուրեն Դավթյանը, սեպտեմբերի 19-ին՝ ժամը 12:00-ի սահմաններում, իր անձնական օգտագործման «Վոլկսվագեն գոլֆ» մակնիշի ավտոմեքենայով դուրս է եկել տանից և այլևս չի վերադարձել: Այս մասին տեղեկանում ենք ՀՀ քննչական կոմիտեի դեպարտամենտի
տեղեկատվության և հասարակայնության հետ կապերի բաժնից:

Վալերիկ Դավթյանի գրավոր հաղորդման վերաբերյալ ոստիկանության ծառայողների կողմից ձեռնարկված որոնողական աշխատանքների արդյունքում սեպտեմբերի 21-ին՝ ժամը 08:40-ին, Սյունիքի մարզի Ծղուկ գյուղի «Բոշկայի ձոր» կոչվող տարածքում հայտնաբերվել է Սուրեն Դավթյանի վթարված ավտոմեքենան և նրա դին՝ ավտոմեքենայից դուրս ընկած:

Դեպքի վայր է մեկնել քննչական-օպերատիվ խումբը՝ ՀՀ քննչական կոմիտեի Սյունիքի մարզային քննչական վարչության ՀԿԳ ավագ քննիչ Ա.Նշանյանի գլխավորությամբ։

Նախնական քննության տվյալներով՝ 26-ամյա Ս.Դավթյանը (զինծառայող, սպա), վարելով անձնական օգտագործման «Վոլկսվագեն գոլֆ» մակնիշի ավտոմեքենան, Մեղրի-Երևան ավտոճանապարհի 202-րդ կմ հատվածում դուրս է եկել ավտոճանապարհի՝ իր երթևեկելի գոտուց, գլորվել աջակողմյան ձորը, որի հետևանքով ստացած մարմնական վնասվածքներից տեղում մահացել է:

Կատարվել են դիակի, դեպքի վայրի, տրանսպորտային միջոցի զննություններ: Փորձագետների դիտարկմամբ՝ դիակի վրա հայտնաբերվել են ճանապարհատրանսպորտային պատահարին բնորոշ մարմնական վնասվածքներ:

Գործով էական նշանակություն ունեցող մի շարք հանգամանքներ պարզելու համար նշանակվել են դիակի դատաբժշկական, դատատեխնիկական և դատաավտոտեխնիկական փորձաքննություններ:

Լուսանկարը՝ Shamshyan.com-ի