«Վատը կամեցող մարդիկ կան, որոնք նախանձից դրդված են չարախոսում». Գայա Արզումանյանն իր հասցեին ուղղված վիրավորանքի մասին

Tert.am Life-ը գրում է.

«Ես հայկական շոուբիզնեսում ամենա-ամենա արցախցի ներկայացուցիչն եմ». Գայա Արզումանյանի այս արտահայտությունը համացանցում քննարկման առիթ է դարձել: Երգչուհու հասցեին վիրավորական խոսքեր են հնչել. «Կաբարե-արտիստի կերպա՞րն է բնութագրում արցախցի կնոջը, թե՞ նրա անգրագետ, ինտելեկտի տարրական բազայից զուրկ մտքեր-ստատուսներն են տիպիկ արցախյան: Էլ չխոսեմ նրա կողմից ամիսներ առաջ «բռնաբարված» «Ղարաբաղի նախշուն բաջիի» մասին, որն ինֆարկտի հասցրեց արցախյան մշակութային ողջ հանրությանը»:

Tert.am Life-ը կապ է հաստատել երգչուհու հետ՝ խոսելով իր հասցեի ուղղված վիրավորանքի մասին:

«Իրականում նորմալ եմ նայում առողջ քննադատություններին: Երբ անիմաստ և միտումնավոր է արված, դա նորմալ չի: Վստահ եմ շատ նախանձ և վատը կամեցող մարդիկ կան, որոնք նախանձից դրդված են գրել: Ես ամեն տեղ պրոպագանդում եմ Արցախը և հպարտ եմ, որ արցախցի եմ: Հնարավոր է շատերը կուզեին լինել իմ փոխարեն և հասնեին հաջողությունների»,- ասաց Գայան:

Կարմիր վարսերով «նախշուն բաջի». ահա այսպես են բնութագրում Գայային: Վերջինիս խոսքով. «Այս ընթացքում բուռն գործունեություն եմ ծավալում: Արդեն կան 3 պատրաստի երգեր, որոնք շուտով կունենան տեսահոլովակը: Դրանցից երկուսը Արցախի մասին են: Բացի այդ շուտով կթողարկեմ նոր ձայնասկավառակ՝ Արցախի հին երգերի հիման վրա ձայնագրած: Ունեմ առաջարկներ դրսի հետ կապված, նոր դուետ սիրված երգչի հետ: Կարծում եմ, այս չարախոսությունները հաջողություններիս պատասխանն են: Ես երբեք կաբարեում չեմ աշխատել: Ռեստորանային համալիրներից մեկում եմ աշխատում, որտեղ նույն բեմում երգում են Նարեկ Բավեյանը, Միհրան Ծառուկյանը և այլն»:

Նյութը՝ Մելինե Տոնոյանի