Շողեր Թովմասյանը` ապագա ծրագրերի ու ընտանիքի մասին

Life.panorama.am-ի զրուցակիցն է դերասան, հաղորդավար Գրիշա Աղախանյանի կինը` դերասանուհի Շողեր Թովմասյանը: Մեզ հետ զրույցում Շողերը պատմել է ոչ միայն աշխատանքային անցուդարձի, այլեւ որդու ու ամուսնու հետ հարաբերությունների մասին:

-Շողեր, տարին նոր է մեկնարկել եւ հետաքրքիր է, թե ի՞նչ ծրագրեր ունեք ընթացիկ տարվա հետ կապված:

-  Տարին լավ եմ սկսել, չեմ բողոքում: Այս պահին մտքերս կենտրոնացված են միայն ստեղծագործելու վրա, որոնց արդյունքները կտեսնենք տարվա ընթացքում:

-Արդեն մի քանի ամիս է, ինչ նկարահանվում եք «Հին արքաներ» հեռուստաֆիլմում. Ի՞նչ զարգացումներ է սպասվում Ձեր հերոսուհուն եւ առհասարակ, ինչպե՞ս կգնահատեք Ձեր աշխատանքն այս նախագծում:

-    Հերոսուհիս արդեն բացահայտված է, նա չար, բացասական կերպար է: Զարգացումները շատ հետաքրքիր են ընթանալու, բայց փակագծեր չեմ ուզում բացել, որպեսզի հեռուստադիտողը հետաքրքրությամբ նայի: Ինչ վերաբերվում է գնահատանքին, չեմ ուզում ինքս գնահատել աշխատանքս, թող դա մնա հեռուստադիտողի դատին:

-Շողեր, Ձեզ հաճախ են քննադատում, եղել է ժամանակ, երբ շատերը չեն ընդունել Ձեր անկեղծ ֆոտոշարքերը, «Հին արքաներ» ֆիլմում որոշ տեսարաններ… Հետաքրքիր է Ձեր վերաբերմունքը քննադատություններին, դրանք Ձեզ որեւէ կերպ կարո՞ղ են կոտրել:

-  Միանշանակ, ինձ հետաքրքիր է հեռուստադիտողի կարծիքը, որովհետեւ ես մենակ չեմ այս կյանքում: Միաժամանակ այնպես չէ, որ առաջնորդվում եմ միայն այդ կարծիքներով: Քննադատություններին փորձում եմ ադեկվատ նայել, քանի որ տվյալ բանը չի կարող անխտիր բոլորի համար լավը լինել: Եթե ես ընտրել եմ այս մասնագիտությունը, ուրեմն ես պատրաստ եմ ինչ-ինչ բաների: Իսկ հուսահատվել, առավել եւս կոտրվել ինձ մոտ չի լինում:

-Հարցազրույցներից մեկում նշել եք, որ համբուրբելու տեսարանում խաղալու համար պետք է ըստ արժանվույն վարձատրվել. Գո՞հ եք Հայաստանում դերասանի վարձատրությունից:

-   Դեռեւս համբույրի տեսարան չեմ  ունեցել, այդ իսկ պատճառով չեմ կարող այդ կողմով պատասխանել, իսկ մնացած դեպքերում, կարող էր ավելի լավ լինել:

-Շողեր, հետաքրքիր է` ինչպիսի՞նն եք որպես մայր եւ կին, ինչպե՞ս ինքներդ Ձեզ կբնորոշեք:

-   Անկեղծ ասած, մինչեւ հիմա լիովին չեմ գիտակցում, որ մայր եմ, անգամ մեկ-մեկ ինձ թվում է, թե բալիկիս քույրն եմ: Ցավոք, շատ ժամանակ չեմ կարողանում անցկացնել երեխայիս հետ, բայց ազատվելուն պես իր հետ եմ լինում: Նրա հետ շատ ընկերական եմ, կարող ենք անվերջ խենթություններ անել միասին. Ինձ թվում է` երբեք խիստ մամա չեմ կարողանա լինել:

-Հասկանալի է, որ Ձեզ եւ Գրիշային չի խանգարել 23 տարվա տարբերությունը, սակայն եթե անկեղծորեն գնահատելու լինեք, ո՞րն է տարիքային նման մեծ տարբերության առավելություններն ու թերությունները:

- Առավելությունն այն է, որ նա հասուն տղամարդ է, որից շատ բան կարող ես սովորել, իսկ տարիքային տարբերության թերությունը զգում եմ այն ժամանակ, երբ իր բացատրությունները ինձ համար մեկ-մեկ անբացատրելի են դառնում:

-Մի անգամ նշել եք, որ եթե գա պահը, որ Գրիշայի հետ միմյանց չհասկանաք, դադար կվերցնեք: Հետաքրքիր է` համատեղ կյանքի ընթացքում եղե՞լ են նման դադարներ:

-   Իհարկե, իմ ու Գրիշայի միջեւ եղել են նման դադարներ:

-Գիտեմ, որ ցանկություն չունեք կրկին մայրանալու. Ինչի՞ հետ է կապված այդ որոշումը եւ արդյոք Ձեր այդ տեսակետը փոփոխման ենթակա չէ՞:

-   Այսպիսի մի լավ արտահայտություն կա` «Երբեք մի ասա երբեք»: Առայժմ ցանկություն չունեմ կրկին մայրանալու, սակայն տարիների ընթացքում գուցե որոշումս փոխվի: