Սպանեցի, որովհետև «անհավատ էին», պետք լինի՝ նորից կանեմ. Ստամբուլի ահաբեկչությունն իրականացրած ուզբեկ գրոհային

Ամանորի գիշերը Ստամբուլում հայտնի «Ռեինա» ժամանցի վայրում ահաբեկչություն իրականացրած 34-ամյա ուզբեկ Աբդուլգադիր Մաշարիպովը ցուցմունք տալու ժամանակ հայտարարել է, որ սպանել է ակումբում Ամանորը նշող մարդկանց, քանի որ վերջիններս «անհավատ էին», և հավելել, որ բնավ չի զղջում: Այս մասին գրում է թուրքական diken.com.tr կայքը:

«Պետք լինի՝ նորից կանեմ», - ասել է ահաբեկիչը: 

Ավելի վաղ Մաշարիպովը հայտնել էր, որ Ամանորի գիշերն իր թիրախը ոչ թե «Ռեինա» ակումբն էր, այլ Թաքսիմի հրապարակը, որտեղ նա չի կարողացել իրականացնել նախատեսված հարձակումը՝ անվտանգության ուժեղացված միջոցառումների պատճառով: 

Ինչպես ավելի վաղ հայտնել է tert.am-ը՝ Ստամբուլի Էսենուրթի շրջանում հայտնաբերված Մաշարիպովի հետ են եղել նաև նրա 4-ամյա որդին և ևս 4 կասկածյալ, որոնցից 3-ը՝ կանայք։ Ձերբակալության պահին «Իսլամական պետություն» ահաբեկչական խմբավորման անդամ հանդիսացող ուզբեկ գրոհայինը դիմադրություն է ցույց տվել իրավապահներին, այնուհետև խնդրել, որ չսպանեն իրեն: Մաշարիպովը փախուստի մեջ գտնվելու ընթացքում փոխել է 4 բնակարան և 8 հեռախոսաքարտ: Հայտնի է, որ բնակարաններից մեկում հայտնաբերվել է մեծ քանակությամբ գումար: 

Ահաբեկիչը հայտնել է, որ գումարը նրան տրամադրվել է ԻՊ-ի կողմից, նրա կողքին գտնվող կանայք, ըստ ուզբեկ գրոհայինի, «նույնպես ԻՊ-ի պարգևատրում էին»:

Հիշեցնենք, որ հունվարի 1-ին՝ տեղական ժամանակով 01.15-ին, Սանտա Կլաուսի հագուստով զինված գրոհայինը ներխուժել էր Ստամբուլի «Ռեինա» գիշերային ակումբ, որտեղ հարյուրավոր մարդիկ տոնում էին Նոր տարին:

Զինված հարձակման հետևանքով զոհվել է 39 մարդ։