Պանթեոնում կայացավ Սիլվա Կապուտիկյանի հիշատակի խնկարկման արարողություն

Մեծանուն բանաստեղծ Սիլվա Կապուտիկյանն այսօր կդառնար 98 տարեկան: Նրա ծննդյան տարեդարձի առթիվ հունվարի 20-ին Կոմիտասի անվան պանթեոնում՝ բանաստեղծուհու շիրիմի մոտ, կայացավ հիշատակի խնկարկման արարողություն: «Կապուտիկյանի գրչակից, նրա մեծ բարեկամ Համո Սահյանն ասում էր, որ Կապուտիկյանը երկու մայր ուներ՝ իր հարազատ Լիան և հարազատ ժողովուրդը: Չգիտեմ` ո՞վ էր նրան ավելի հարազատ: Ըստ իս`նա ստեղծեց այն կամուրջը, որը միացրեց Հայաստանն ու սփյուռքը»,-«Արմենպրես»-ի հաղորդմամբ, նշեց Սիլվա Կապուտիկյանի տուն-թանգարանի վարիչ Արմենուհի Դեմիրճյանը:

Ե. Չարենցի անվան  գրականության և արվեստի թանգարանի տնօրեն Կարո Վարդանյանի խոսքով` Կապուտիկյանի բոլոր բանաստեղծություններում պատգամ կա: «Ցանկալի է, որ մենք հաղորդակից լինենք նրա ստեղծագործություններին, քանի որ դրանք այսօր առավել, քան երբևէ արդիական են»,-շեշտեց Վարդանյանը:

Խնկարկման արարողությանը ելույթներ ունեցան Ս. Կապուտիկյանի անվան թիվ 145 դպրոցի ասմունքի խումբը, Վ. անվան թիվ 60 դպրոցի աշակերտները:

ՀՀ մշակույթի փոխնախարար Ներսես Տեր-Վարդանյանն ընդգծեց, որ Սիլվա Կապուտիկյանը ոչ միայն օրինակելի բանաստեղծ, այլև օրինակելի քաղաքացի էր, որն ակտիվ մասնակցում էր հանրությանը հուզող հարցերի լուծմանը և որի պատգամներին պետք է հետևել միշտ:

Սիլվա Կապուտիկյանի տուն-թանգարանի հիմնադիր-տնօրեն Ռաֆլետա Հաջյանն ասաց, որ չափազանց մտերիմ է եղել Կապուտիկյանի հետ և փորձել իրականացնել նրա պատգամները: «Շնորհակալ եմ բոլոր նրանց, ովքեր իրենց երախտիքն են հայտնում մեծ բանաստեղծին»,-նշեց Հաջյանը:

Սիլվա Կապուտիկյանը ծնվել է Երևանում, Վանից գաղթած ընտանիքում։ Սովորել է Երևանի Ն. Կ. Կրուպսկայայի անվան միջնակարգ դպրոցում։ 13 տարեկանում գրել է իր առաջին բանաստեղծությունը, որը տպագրվել է «Պիոներ կանչ» թերթում։ Նրա հայրը՝ Բարունակ Կապուտիկյանը, ազգային գործիչ էր, խմբագիր:

1936-1941 թվականներին Կապուտիկյանը սովորել է ԵՊՀ բանասիրական ֆակուլտետում, 1950 թվականին՝ Մոսկվայի Մ. Գորկու անվան գրականության ինստիտուտի բարձրագույն դասընթացներում։

Կապուտիկյանը շատ է գրել հայրենիքի, հայոց լեզվի, հայ ժողովրդի ճակատագրի մասին։ Եղել է սփյուռքի հայկական գաղթօջախներում և նախկին Խորհրդային Միության տարբեր երկրներում։ Կապուտիկյանի ստեղծագործությունները թարգմանվել են բազմաթիվ լեզուներով։

Արժանացել է բազմաթիվ մրցանակների, կոչումների, շքանշանների։ Բանաստեղծը կյանքից հեռացել է 2006 թվականին: