Ծաղկաձորում կյանքի է կոչվել արտահանման խթանմանն ուղղված նոր նախագիծ

   ՀՀ կառավարության որդեգրած տարածքային համաչափ զարգացման ու հայկական գինեգործական ավանդույթների հանրահռչակման հիմնական առաքելությամբ՝ Ծաղկաձորում կյանքի կոչվեց արտահանման խթանմանն ուղղված նոր նախագիծ։ Հայաստանի զբոսաշրջային քաղաքներից մեկի բնակիչներն ու այցելուներն այսուհետև կարող են հայկական գինի և մոռացված ճաշատեսակներ վայելել &la quo;VINUM» գինետանը։ Նախագծի հիմնադիր Ստեփան Ավագյանի խոսքով՝ հայկական գինեգործական ավանդույթները հավուր պատշաճի ներկայացված չեն աշխարհում, մինչդեռ, ըստ նրա, կան բոլոր նախադրյալները՝ պնդելու, որ Հայաստանն աշխարհում կարող է հայտնի դառնալ իր բարձրակարգ արտադրանքով։ Այս մասին «Արմենպրես»-ին տեղեկացրին Հայաստանի զարգացման հիմնադրամի լրատվական ծառայությունից:

«Մենք որդեգրել ենք նոր մոտեցում՝ լուծելով է մի քանի խնդիր՝ զբոսաշրջության զարգացման, գինու մշակույթի հանրահռչակման և տեղական գինեգործների համար հարթակ դառնալու։ Նպատակ ունենք «VINUM»-ը դարձնել բրենդ, որի ներքո տեղական արտադրողները կարող են ներկայացնել իրենց գինին թե տեղական, թե դրսի սպառողներին»,-նշել է Հայաստանի զարգացման հիմնադրամի Ներդրողների աջակցության բաժնի մասնագետ Ստեփան Ավագյանը։

Տեղական արտադրողների համար կենտրոնը կարևոր է հատկապես նրանով, որ արդեն զբոսաշրջիկներին ու սպառողներին կարող են ներկայանալ ոչ միայն գովազդով, այլ նաև արտադրանքի համտեսով:

Սկզբնական շրջանում գինետանը կաշխատի տասը մասնագետ, որոնք հիմնականում երևանաբնակներ են: Նախատեսվում են վերապաստրաստման դասընթացներ նաև ծաղկաձորցիների համար։ Նախագիծը հեռանկարում նպատակ է դնում տարածվել նաև Հայաստանի այլ քաղաքներում, իսկ ճանաչելի դառնալուց հետո՝ Վրաստանում և Ռուսաստանի Դաշնությունում։