Տիգրան Ուրիխանյանը կողմնակից է ընտրություններին լայն դաշինքով մասնակցելու տարբերակին

ՔԱՂԱՔԱԿԱՆ 23 Հունվար, 2017 15:46

«Ալյանս» կուսակցությունն Ազգային ժողովի առաջիկա ընտրություններին մասնակցելու ձևաչափը կհստակեցնի փետրվարի 4-ին կուսակցության արտահերթ համագումարից հետո: Հունվարի 23-ին լրագրողների հանդիպմանն այս մասին հայտնեց «Ալյանս» կուսակցության հիմնադիր, կուսակցության վարչության անդամ, Ազգային ժողովի պատգամավոր Տիգրան Ուրիխանյանը: «Ես հիմա ներկայանում եմ որպես անհատ և այժմ որևէ տեսակետ չեմ կարող հայտնել մեր կուսակցության անունից՝ ապագա խորհրդարանական ընտրություններին մեր մասնակցության ձևաչափի վերաբերյալ։ Փետրվարի չորսին պատրաստվում են գումարել իրենց կուսակցության արտահերթ համագումարը, ինչի ժամանակ էլ կտեղեկացնեն, թե ինչ ձևաչափով են մասնակցելու ընտրություններին՝ դաշինքո՞վ, թե՞ առանց»,-«Արմենպրես»-ի հաղորդմամբ` ասաց Ուրիխանյանը:

Նա հավելեց, որ իրենք մշտապես հայտնել են, որ չմիավորվելու ճանապարհով ընտրություններին գնալը ձեռնտու չէ և իրենց քաղաքական կուրսի մասը չէ։ «Այլևս լայն դաշինքով մասնակցելն ընտրություններին շատ կարևոր է։ Միավորումներով հանդես գալու կարևորությունը տեսանք նաև ՏԻՄ ընտրությունների ժամանակ։ Ես, բնականաբար, մշտապես ասել եմ ու խոսել եմ ընդդիմադիր դաշտում միավորումների ձևավորման ու այդ ձևաչափով մասնակցելու մասին»,- ասաց Ուրիխանյանը:

Անդրադառնալով հաջորդ գումարման խորհրդարանում լինել-չլինելու վերաբերյալ հարցին` պատգամավորն ընդգծեց, որ այդ հարցին ինքը չէ, որ պետք է պատասխանի: «Ինչպես հայտնի է, Հայաստանում խորհրդարանը ձևավորում է Հայաստանի քաղաքացիների կողմից։ Իսկ եթե ավելի լուրջ՝ խորհրդարանական հինգ տարիները եղել են ծանր, անշնորհակալ ու խնդիրներով լի տարիներ։ Հետևաբար` ես չէ, որ պետք է շահագրգիռ լինեմ շարունակելու այդ ծանր աշխատանքը։ Եթե Հայաստանի քաղաքացիները կորոշեն, որ ես լինեմ խորհրդարանում, ապա ես կշարունակեմ պայքարել գողերի ու հանցագործների դեմ ։ Շարունակելու եմ քննադատել, բերել այն օրենքի նախագծերը, որ հանրային շահերից են բխում։ Շարունակելու եմ իմ ընդդիմադիր գործունեությունը, և եթե կան Հայաստանի այնպիսի քաղաքացիներ, որ կարծում են՝ այդ գործունեությունն արդարացված է, ապա ես կշարունակեմ ԱԺ-ում իմ գործունեությունը»,- մանրամասնեց Տիգրան Ուրիխանյանը: