ՀՀ կառավարությունն առաջարկում է երկարացնել գիտության ոլորտի աշխատողների ամենամյա արձակուրդը

Հանրապետության գիտական և գիտատեխնիկական կազմակերպությունների գիտական աշխատողներին կտրվի ամենամյա երկարացված արձակուրդի իրավունք: Այդ նպատակով կառավարությունն «Ամենամյա երկարացված արձակուրդի իրավունք ունեցող առանձին կատեգորիայի աշխատողների ցանկը սահմանելու մասին» N 1599-Ն որոշման հավելվածով սահմանված ցանկում կընդգրկի նաև հանրապետության գիտական և գիտատեխնիկական կազմակերպությունների գիտական աշխատողներին: Ինչպես հաղորդում է Արմենպրեսը՝ համապատասխան որոշման նախագիծն ընդգրկված է կառավարության սեպտեմբերի 25-ի նիստի օրակարգում:

Հիմնավորման համաձայն՝ նախագծի ընդունման անհրաժեշտությունը պայմանավորված է  այն հանգամանքով, որ գիտական աշխատանքն ինքնին համարվում է մտավոր և հուզական գերլարվածության բնույթի աշխատանք: Ուստի նպատակահարմար է, որ այդպիսի աշխատանքով զբաղվող անձինք կարողանան լիարժեք վերականգնել իրենց ուժերն ու կարողությունները, ինչի հնարավորությունն ավելի քիչ է ամենամյա նվազագույն արձակուրդի պայմաններում: Այդ են վկայում ՀՀ Գիտությունների ազգային ակադեմիայի, ինչպես նաև հանրապետության գիտական կազմակերպությունների գիտաշխատողների&nb sp;բազմաթիվ գրավոր ու բանավոր դիմումները:

Ներկայում ՀՀ աշխատանքային օրենսգրքի 160-րդ հոդվածից բխող ՀՀ կառավարության 2005 թվականի օգոստոսի 11-ի N 1599-Ն որոշմամբ սահմանված ամենամյա երկարացված արձակուրդի իրավունք ունեցող առանձին կատեգորիայի աշխատողների ցանկում ընդգրկված են բարձրագույն ուսումնական հաստատությունների դասավանդողները, որոնք գիտելիք են փոխանցում երիտասարդ սերնդին, իսկ գիտական կազմակերպություններում աշխատող գիտելիք ստեղծող, գիտությունը զարգացնող գիտաշխատողները զրկված են այդ իրավունքից:

Ներկայում գիտական և գիտատեխնիկական կազմակերպությունների գիտական աշխատողներին տրամադրվում է ամենամյա նվազագույն արձակուրդ՝ հնգօրյա աշխատանքային շաբաթվա դեպքում 20, իսկ վեցօրյա աշխատանքային շաբաթվա դեպքում` 24 աշխատանքային օր տևողությամբ:

Ամենամյա երկարացված արձակուրդի տևողությունը հնգօրյա աշխատանքային շաբաթվա դեպքում կազմում է 25, իսկ վեցօրյա աշխատանքային շաբաթվա դեպքում` 30 աշխատանքային օր: